Wafatnya Adipati Ageung Koeosoemajoeda, 14 Agustus 1833 dan Dalem Alit Wafat 28 Juli 1834

SEKILAS SEJARAH ADIPATU AGEUNG KOESOEMAJOEDA

Tina sabab Nagara kakurangan duit, nya dina taun 1828 Gupernemen marentah ngamajukeun pelak tarum, kapas, teh, bako sjt, sarta miara kutu “konzonielje”, nu ngaluarkeun cet serlak.

Para wargi Sukapura, nyaeta :

1.  Rd. Haji Moehamad Salim, Panghulu Garut;

2.  Rd. Wangsajoeda, Papatih-jero;

3.  Rd. Rangga Soeradiredja, Kumetir Limbangan;

4.  Rd. Kanduruan Satjawadana, Kapala-cutak Nagara;

5.  Rd. Kanduruan Joeda-Manggala, Kapala-cutak Panembong;

6.  Rd. Soerawiredja, Kapala-cutak Wanakerta;

7.  Rd. Kartadiredja, Kapala-cutak Pangandaran;

8.  Rd. Wiradimanggala, Kapala-cutak Suci;

9.  Rd. Raksadiredja, Kapala-cutakTaraju;

10. Rd. Sastradiredja, Kapala-cutak Batuwangi;

11. Mas Ngabei Soemadiredja, Kapala-cutak Karang;

12. Rd. Tanoeredja, Camat-cutak Wanaraja;

13. Rd. Djiwadiredja, Camat-cutak Panembong;

14. Djajapradja, Camat-cutak Wanakerta;

15. Rd. Keretemanggala, Camat-cutak Payung

16. Rd. Singapradja, Camat-cutak Panyeredan;

17. Rd. Aria Danoeningrat Papatih-Kumetir Limbangan, nu jadi luluguna, geus nyanggakeun surat rekes ka Residen Priangan titimangsa Limbangan 30 Juni 1828, nyuhunkeun supaya Bupati Limbangan Adipati Adiwidjaja dialihkeun ka Sumedang, ngagentos rama Pangeran Kornel Koeseoemah Adinata, sarta kabupaten Sukapura diadegkeun deui dibupatian ku Raden Tumenggung Wiradadaha, mantu Pangeran Sumedang nu garwaan ka Rd. Ajoe Radjaningrat, nu tadina carogean ka Bupati Bandung Adipati Wiranata Koesoemah (Dalem Kaum).

Ieu panuhun para wargi Sukapura lila-lila kaemper-emper ka Bupati Limbangan Adipati Adiwidjaja, barang kauninga oge lajeng bae bendu sarta mundut Rd. Aria Danoeningrat jeung Rd.Haji Moehamad Salim tina pangkatna dilepas ka tuan Residen Priangan ku suratna tanggal 1 Mei 1829, nu dilampiran surat asal-usul Dalem Adipati Adiwidjaja pacantel kawargian jeung para bupati Limbangan anu asli jeung para Bupati anu ngasta Sumedang. Aya dua “daptar turunan Regent Sumedang” jeung “daptar turunan Regent Limbangan”. Eta sarsilah dina seratan Dalem Adipati Adiwidjaja Garut dina tanggal 1 Mei 1829 beunang dipake katrangan keur menerkeun sarsilah-sarsilah nu beunang nyieun anyar, tur nuduhkeun tedak Bupati Sumedang jeung Limbangan aya hak neruskeun talapakan karuhun di Garut.

Ku lantaran rekes, jeung ceuk beja kampung, Dalem Aria Danoeningrat kungsi dialihkeun ti Garut ka Sumedang, mulihna ka Sukapura dipapancenan melak tarum ku Nagara. Ari sabenerna mah, Dalem Aria Danoeningrat teh, ku lantaran rekes tea, ku Residen Priangan dialihkeun ka Banjar, sarta tetep ngagem Papatih-kumetir, nyepeng cutak-cutak pakidulan bawahan Sumedang nu asal ti kabupaten Sukapura nu diburak tea.

Sangalihna Raden Aria Danoeningrat ka Sumedang, digentoskana Papatih-kumetir ku putra Dalem Adipati Adiwidjaja pangbarepna Raden AriaDjanegara, tina Kapala-cutak Cikadu Tanjungsari, ti Sumedang dialihkeun ka Limbangan jadi Papatih rama ku anjeun.

Dina taun 1829 keneh, bulan Maart Bupati Bandung Raden Adipati Wiranata Koesoemah II (Dalem Kaum) pupus. Ku surat tuan Residen Priangan O.C. Holmberg de Beckfeldt tanggal 7 Maart disuhunkeun pikeun gentosna putrana anu cikal Kapala-cutak Tarogong Raden Tumenggung Anggadiredja nu nembe mulihtina ngajaga karaman di Tasikmalaya sarta ku bisluit Gupernemen tanggal 27 Mei 1829 diangkat jadi Bupati Bandung, nampi gelaran Adipati jeung gentos jenengan Raden Adipati Wira NataKoesoema (nelahna engke Dalem Karanganyar).

Pindah taun 1830 dina mimiti bulan Januari pisan, tuan Besar anyar (J. Van den Bosch) sumping ka Batawi, nampina pamarehtahan tituan Besar Kommissaris-generaal duGisignies dina tanggal 16 januari 1830, nya waktu ieu timbulna usul tangtung Pamarentah nu disebut “cultuurstelsel” (Aturan taneman) teh, sabab nya  ti harita Nagara ngumpulkeun duit ku ngamajukeun rupa-rupa taneman, babakuna kopi, tina laladangan pepelakan nu dijualan di pasar-pasar Eropa, nu nguntungkeun ka Gupernemen mangyuta-yuta rupia. Karaman pangeran Ario Diponegoro oge tumpesna dina taun 1830.

Dina mimiti taun 1831, Patih Sumedang Raden Demang Natanegara mundut liren, gentosna Biskal Sumedang (angkatan Mei 1824) Raden  Aria Soerialogawa putra Dalem talun ti raden Ayu Kamsiah, saderek Dalem Adipati Enoh Cianjur. Dina taun 1832 Patih Sumedang Raden Aria Soerialogawa nampi gelaran Tumenggung, jadi Raden Tumenggung Soeriadilaga.

Dina tanggal 9 September 1831 Bupati Limbangan Raden Adipati Adiwidjaja, putra Pangeran Kornel nu pangsepuhna di Garut, pupus sarta tug ka kiwari nelahna dalem Cipeujeuh. Nu ngagentos kana Bupati Limbangan putrana cikal Raden Aria Djanegara, Patih Limbangan, diangkatna ku bisluit resolutie tanggal 18 October 1831 nampi gelaran Tumenggung jadi Raden Tumenggung Koesoema Adiningrat.

Kana Patih Limbangan anu diangkat Kapala-cutak Pasanggrahan Raden Wiranagara putra Bupati Cianjur Adipati Wiratanoe Datar (Dalem Enoh) nu kakasihna keur murangkalih Aom Abas, dikukut ku Pangeran Kornel.

Panuhun para wargi Sukapura ku resolutie 18 October 1831 dikabulkeun, Kabupaten Sukapura dihudangkeun deui sarta dijieun tina distrik-distrik anu diasupkeun ka wewengkon Limbangan nyaeta Batuwangi, Panyeredan, Taraju, Sukapura, Selacau, Parung, Karang jeung Nagara. Ieu 8 distrik di pakidulan diheuyeuk ku Bupati Sukapura pansiun nu ayeuna diangkat deui kana Regen Sukapura kaopat kalina, nu salamina liren jadi wakil regen Limbangan, kalawan tetep ngagem gelaran jeung jenengan nu ayeuna nya eta: Raden Tumenggung Wiradadaha, mantu Pangeran Kornel, caroge Raden Ajeng, tilas Dalem Kaum Bandung, ayeuna jenenganana Raden Ayoe Radjaningrat.

Dina taun 1832 di Krawang timbul barandal urang Tionghoa, nu maehan tuan Macklot, Amtenar Gupernemen nu keur dipapancenan mariksa leuweung-leuweung. Ieu barandal ditumpesna, bejana ku urut senapati Pangeran Ario Diponegoro, Pangeran Sentot Alibasah Prawiradirdja.

Ku bisluit 22 April 1833 Bupati Cianjur  Raden Adipati Prawiradiredja (Dalem Kaum) mundut liren lantaran teu damang, teras dipansiun, diganti ku putrana Raden Tumenggung Wiranagara, putra Dalem Adipati Enoh tea, anu kakasihna keur murangkalih Aom Abas, ngan teu kamanah.

Dina tanggal 14 Agustus 1833 tuan Residen Priangan unjukan ka tuan Besar, yen Bupati Sumedang, Raden Adipati Koesoemajoeda di Indihiang ngadak-ngadak pupus, ngaluga-lugakeun getih, nilarkeun putra pameget dua, nu nembe disepitan tilu bulan katukang. Nu cikal kakasihna Raden Ahmad, ana dilandi bada diberesihan: Raden Somanagara, ngan so kdiserat Soemanagara (Sumanagara). Nu burey jenenganana Raden Moehamad (Muhamad) dilandi Raden Prawirakoesoemah (Prawirakusumah) engkena gentos deui kakasihna, Raden Koesoemajoeda, ngalap jenengan rama. Putra pameget katilu Raden Moestapa (Mustapa), nalika ramana pupus teh, di lebet wewetengan keneh. Putra istri nu ditilar aya genep. Raden Soemanagara yuswana nembe 16 taun.

Makam Adipati Ageung Koesoemajoeda Di Komplek Makam Pasarean Gede Sumedang
Sebelum Direnovasi

Makam Adipati Ageung Koesoemajoeda Di Komplek Makam Pasarean Gede Sumedang
Setelah Direnovasi

Dalem Adipati Ageung Koeosoemajoeda, nyaeta Bupati Sumedang 1828 - 1833 dina masa Walanda raina Dalem Adipati Adiwijaya dalem  nu ngajabat janten Bupati Limbangan (Dalem Cipeujeuh), anu sami-sami pala putra Pangeran Kornel (Soerianagara 3 / Rd. Djamoe), dimakamkeun di Pasarean Gede Sumedang.

1. Pangeran Kornel Soerianagara III (Rd Aom, Rd Djamoe) migarwa istri ka 1 NR. Lenggang Kusumah, puputra : 

1.1 Dlm. Adipati Adiwidjaja 

1.2 Dlm. Adipati Ageung Koesoemajoeda

1.3 RA. Radjaningrat 

1 Pangeran Kornel Soerianagara III (Rd Aom, Rd Djamoe) migarwa istri 2 NR. Tjandra Nagara, puputra : 

1.4 RA. Radjanagara

Numutkeun data Sejarah Sumedang salinanan tina buku sejarah kagungan Rd. Yusuf Wiraatmadja ti Galunggung Sumedang. 

1.2 Dlm.  Rd. Adipati Koesoemajoeda, Bupati Sumedang 1828 - 1833, puputra :

1.2.1 Rd. Somanagara (Pangeran Soegih Soeria Koesoemah Adinata), ti Nyi Emas Samiah / Samidjah Indihiang - Tasik

1.2.2 Rd. Koesoemajoeda, ti Nyi Emas Baliah, Galunggung Smd

1.2.3 NR. Siti Marian, ti Nyi Emas Natamoelya. 

1.2.5 NR. Lenggang Nagara, ti Nyi Emas Natamoelya

1.2.6 NR. Koesoemaningroem, ti Nyi Emas Salam 

1.2.7 NR. Moenigar, ti Nyi Emas Supiah 

1.2.8 NR. Radjaningroem, ti Nyi Emas Ibuna NR. Radjaningroem

1.2.9 NR. Jogjanagara / NR Lenggang Mantri / NR Rakem, ti Nyi Emas Ibuna NR. Radjaningroem

Ket : Makam NM. Samidjah di Indihiang Tasikmalaya.

Ku surat tanggal 20 Agustus 1833 tuan Residen nyanggakeun rupa-rupa panuhun nu ku Pamarentah Agung digugu ku resolutie tanggal 10 September 1833, nyaeta dina :

Artikel 1. Bupati Limbangan Raden Tumenggung Koesoema Adiningrat dialihkeun ka Sumedang, ngagentos rama-paman kawuwuh mertua Bupati Sumedang nu nembe wapat Adipati Koesoemajoeda, jumeneng Bupati Sumedang jujuluk Raden Adipati Koesoemadinata, atuh jadi ngalihna ka Sumedang teh nampi gelaran Adipati jeung gentos jenengan.  Gentosna di Limbangan, Raden Demang Wiranagara, Patih Garut, nu kapernah mantu Bupati nu dialihkeun ka Sumedang tea, garwaan ka Raden Ayu Radjapoernama (Rajapurnama), diangkat kana Regen Limbangan nampi gelaran Tumenggung, gentos jenengan jadi Raden Tumenggung Adiwidjaja, ngalap jenengan mertua-eyang. Nurutkeun artikel 1. bisluit eta keneh diangkat kana Papatih-polisi Limbangan, Hup-kumetir kopi taneman nagara, raden Demang Soerianagara, putra Dalem Talun Adipati Soerialaga II ti Raden Ayu Radjanagara (Rajanagara), putra Pangeran Kornel, nampi gelaran Aria, jadi Raden Aria Soerianagara.

Artikel 2. Raden Soemanagara putra Bupati marhum Raden Adipati Koesoemajoeda, dicalonkeun bakal jadi Bupati Sumedang, upama nu nembe diangkat Regent Sumedang Raden Adipati Koesoemadinata wapat.

Artikel 3. Kabupaten Sukapura, nu diadegkeun deui ku resolutie 18 October 1831 dayeuhna nu dipindahkeun ka sisi walungan Citanduy dingaranan Harjawinangun, diatur deui wewengkonna digedean ku distrik-distrik nu katarik ka Sumedang, dipulangkeun, iwal ti distrik Cidamar tetep ka Cianjur. Distrik-distrik anu kawengku ku Sukapura teh, nya eta: Panyeredan, Selacau, Parung, Karang, Nagara, Batuwangi, Taraju, Kandangwesi, Pasirpanjang, Janggala, Kewasen, Cikembulan jeung Mandala.

Artikel 4. Bupati Sukapura Raden Tumenggung Wiradadaha diganjar gelaran Adipati. 

Bupati Sumedang Raden Adipati Koesoemadinata, nu kakara diangkat, kacida ririwitna nepi ka padamelanana dina ngaheuyeuk nagara kudu dijalankeun ku Papatih-polisi Sumedang Raden Tumenggung Soeriadilaga, ramana Dalem Talun Adipati Soerialaga II, Bupati pansiun Bogor-Karawang-Sukapura ku resolutie 13 Juli 1834 nampi tambahan pansiun artos f.50,- jadi saban bulan nampi pansiun rupa arta f.150,-

Ku surat tanggal 29 Juli 1834 tuan Residen Priangan unjukan ka tuan Besar, yen Bupati Sumedang Raden Adipati Koesoemadinata X dina tanggal 28 Juli 1834 pukul 4 sore parantos wapat. Di Sumedang, katelahna nepika ayeuna : “Dalem Alit”. (Makamnya di Pasarean Gede Sumedang).

Bupati Limbangan Raden Tumenggung Adiwijaja kaidinan gentos jenengan ku bisluit resolutie 18 Augustus 1834 jadi Raden Tumenggung Djaja Ningrat (JayaNingrat).

Ku surat tanggal 2 September 1834 Patih Garut Raden Aria Soemanagara dialihkeun kana Patih Sumedang, sarta kana Patih Limbangan diangkat Raden Adiwidjaja putra marhum Adipati Adiwidjaja (Dalem Cipeujeuh) tina Houp-kumetir kopi Limbangan.

Ku panuhunna nu jadi rama Adipati Prawiradiredja, Bupati Cianjur warnen, Raden Tumenggung Wiranagara dilungsurkeun tina kalungguhan digentos ku Bupati Cianjur nurutkeun resolutie 10 October 1834, ku saderek sarama tina Papatih polisi Raden Rangga Wiradiredja, jumeneng Regent jujuluk Raden Tumenggung Wiradiredja, nu dina resolutie 28 November 1834 kaidinan gentos jenengan Raden Tumenggung Soeria Nata Ningrat.

Nohonan nu dijangjikeun dina artikel 2, resolutie 10 September 1833, diangkat kana Bupati Sumedang ku resolutie 20 October 1834 dina artikel 1. Raden Soemanagara putra Bupati Sumedang marhum Raden Adipati Koesoemajoeda, kalawan nampi gelaran Tumenggung, jujuluk Raden Tumenggung Soemanagara, dijangjikeun dimana yuswa 21 taun bakal dipasrahan kabupatian jeung damelna, sabab yuswana ayeuna kakara 171/2 taun, sarta ku artikel 2. ditetepkeun salila tacan manjing yuswa, padamelan kabupatian diwakilkeun ka Papatih-polisi Sumedang Raden Tumenggung Soeriadilaga, nu diangkat kana warnen-Regen Sumedang sarta dipatihan ku saderek sarama Raden Aria Soerianagara.

Bupati Sumedang anyar, sabab anom keneh pisan didamelkeun di kator karesidenan Cianjur, teras dibantukeun ka Bupati Bandung Adipati Wira Nata Koesoema (Dalem Karanganyar), ginahu sagala damel nu jadi Bupati tina bagbagan ngaheuyeuk nagara jeung tina bab taneman kopi, linggih di dayeuh Bandung nepi ka bulan September 1835, ti dinya mulih ka Sumedang calik di pakarangan Kaparek, ari Bupati-warnen ti padaleman ngalih ka bumi pakarangan Depok, Patih Raden Aria Soerianagara ka bumi di Cipada, gedong padaleman dikosongkeun bae.

Ku resolutie 17 December 1835 kapasrahan damel karegenan, diistrenan dina poean Lebaran tanggal 20 Januari 1836, Bupati-warnen Raden Tumenggung Soeriadilaga lajeng lugay tina damel, mundut liren sarta dipansiun nyandak tina hasil kopi Bupati aprekin saban bulan f.250,-. Teras mantenna ti bumi Depok ngalih bumen-bumen di kampung Sindangraja, nu matak nepi ka ayeuna nelah Dalem Sindangraja.

Ku resolutie 22 Maart 1836 dua priyayi Limbangan: Patih jeung Hupkumetir Limbangan: Raden Adiwidjaja jeung Raden Kanduruan Wiradimanggala, putra Onderegen Sukapura raden Tumenggung Danoeningrat diganjar gelaran demang jeung Rangga jujuluk Raden Demang Adiwidjaja jeung Raden Rangga Tanoewangsa.

Ku surat  Residen Priangan tanggal 6 Mei 1837 kaunjukkeun Bupati Sukapura Raden Adipati Wiradadaha pupus, diganti kana Regen ku saderekna Raden Tumenggung Danoeningrat, nu nampi gelaran ku akte tanggal 13 December 1831, diangkat kana Bupati Sukapura ku bisluit tanggal 15 Juni 1837, teras gentos jenengan ku bisluit tanggal 22 Mei 1840 jadi Raden Tumenggung Wira Tanoe Baja ngalap tedak Parakanmuncang jenengan ramana Bupati Sukapura (taun 1765/1770 – 1807) Adipati Wira Tanoebaja.

Dayeuh Sukapura Harjawinangun, diadegkeun taun 1831 ku bisluit tanggal 10 Januari 1839 (Staatblad no.2) diganti ngaranna jadi Manonjaya.

Tilu Bupati Priangan kaidinan ku bisluit 14 Augustus 1841 gentos jenengan nyaeta Bupati Limbangan asal jenengan Djaja Ningrat dilandi Raden Tumenggung Wira Tanoe Datar, ngalap jenengan rama (Dalem Enoh Cianjur). Bupati Cianjur tina jenengan Soeria Nata Ningrat ku ieu bisluit jadi Raden Tumenggung Aria Soeria Adiningrat. Nu katilu kaidinan gentos jenengan Bupati Sumedang asal ngalap jenengan tedak Limbangan wungkul  Raden Tumenggung Soemanagara, didinan ku bisluit ieu nyandak jenengan para luluhur Sumedang dikantetkeun jeung Limbangan, nurutkeun serat tanggal 26 November 1840 jujuluk Raden Tumenggung Soeria Koesoemaadinata.

Ku bisluit Gupernemen tanggal 31 October 1850 dua Bupati nampi gelaran Adipati. Bupati Sumedang jujuluk Raden Adipati Soeria Koesoemaadinata, ari Bupati Cianjur ditambah ku mundut ganti jenengan deui, diidinan ku bisluit tanggal 11 Maart 1851 jujuluk: Raden Adipati Aria Koesoema Ningrat.

Salam Santun

Sumber :

Buku "Sajarah Sumedang", tulisan RA Natanagara  (Sambungan VA 1935)

Baca Juga :