Wafatnya Pangeran Kornel, 30 Juli 1828

Bila kita berjiarah ke makam karuhun Pangeran Kornel, kita tidak mengetahui kapan tanggal meninggalnya Karuhun Rd. Jamu, atau lebih dikenal di masyarakat dengan sebutan Pangeran Kornel yang gigih memperjuangkan hak-hak upah rakyat kecil yang dipekerjakan sewaktu pembangunan jalan Anyer - Panarukan oleh Kompeni Belanda, yang melewati "Cadas Pangeran", sehingga dapat digunakan sebagai Akses jalan Lintas antara Propinsi dan Kabupaten, hingga sekarang ini.

Pangeran Kornel ialah nama lain bagi Pangeran Kusumadinata XI, Bupati Sumedang tahun 1791-1828, Pangeran Kusumadinata oleh Belanda diangkat sebagai kolonel tituler. Istilah “kolonel” yang masih langka pada zaman itu, mengalami rinéka sora atau gejala perubahan fonem dalam bahasa Sunda menjadi “kornel”. 

Pangeran Kornel atau Pangeran Kusumadinata IX dilahirkan  pada tahun 1762 dengan nama Surianagara III, putra dari pasangan Adipati Surianagara II (Bupati Sumedang tahun 1761-1765) dan Nyi Mas Nagakasih. Semasa kecilnya beliau dikenal dengan nama Raden Djamoe. Pada saat ayahnya meninggal pada tahun 1765, diangkatlah bupati penyelang/sementara dikarenakan Raden Djamu yang masih balita belum bisa naik tahta menjadi Bupati Sumedang. Baru pada tahun 1791, Raden Djamu alias Soerianagara III diangkat menjadi Bupati Sumedang dengan gelar Pangeran Kusumadinata IX (memerintah tahun 1791–1828).

SEKILAS SAJARAH PANGERAN KORNEL

Mantenna kakasihna keur murangkalih “Rd. Djamoe”, putra Bupati Sumedang Raden Adipati Soerianagara, ditilar ku rama dina yuswa 3 taun sarta sanggeus sawawa dilandi jenengan “Raden Soerianagara”.

Dina buku-buku Babad Sumedang loba pisan kacaturkeunana, malah kacaritakeun dina waktu keur nonoman kungsi lolos ti Sumedang ngantunkeun garwa nu keut bobot, putra Bupati Sumedang waktu eta (taun 1775-1789 M) Raden Adipati Tanoebaja II, nu dina Babad Sumedang mah katelahna Raden Tumenggung Tanoebaja II atawa Dalem Tumenggung Patrakusumah, sabab dikendangkeun ka Batawi, linggih di kampung Patuakan, dugi ka pupusna, sarta nelahna “Dalem Patuakan” bae. 

Nurutkeun carita dina Babad Sumedang mah anjeunna teh nu hasud ka para putra Sumedang tea, babakuna ka Raden Soerianagara, nepi ka kersa nandasa kanu jadi mantu. Ceuk sakaol mah, Raden Soerianagara (Soerianagara II) ka Dalem Patuakan (Patra Koesoemah) teh kapernah dahuan, saderek garwana. Ari katerangan nu nulis ieu karangan mah, dongengna Raden Soerianagara (Rd. Djamoe) teh beda pisan jeung dongeng dina Babad Sumedang sarta nurutkeun surat-surat asli nu kapanggih, kieu tuturanana :

Raden Adipati Soerianagara, sasurudna dina taun 1765, nilarkeun putra istri tilu, nyaeta :

1. Nyi Raden Jogjanagara 

2. Nyi Raden Sarianagara

3. Nyi Raden Bandianagara

Jeung hiji putra pameget murangkalih keneh pisan yuswa 3 taun, nu nelah kakasih Asep Djamoe.

Digentos kana Bupati Sumedang ku saderek Raden Soerialaga (Soerialaga I), nya anjeunna anu katitipan para putra sarta raja-kaya Raden Adipati Soerianagara make surat wasiat, nu ayeuna aya keneh, malah anu disuhunkeun ka Kumpeni oge nya anjeunna pisan sarta terus diangkat kana Regen Sumedang jujuluk Raden Adipati Koesoemadinata, tapi ari nelahna mah Dalem Adipati Soerialaga II bae.

Dina taun 1773 mantenna pupus, ngantunkeun 6 putra (2 istri jeung 4 pameget) tapianu kocap mah ngan 3 putra pameget ti 3 garwa padmi, nyaeta :

1. Raden Soerjadipradja yuswa 20 taun, ibuna Nyimas Nataesah, putra Raden Poespanata (Puspanata) putra Pangeran Karoehoen.

2. Raden Adipati Soerialaga II, keur murangkalih kakasihna Asep Ema, nalika ditilar ku rama yuswana 6 taun, ari ibuna Nyi Raden Radjamirah, putra Raden Gedra, putra Patih Sumedang Raden Soetanata.

3. Raden Soeriawiredja, yuswa 5 waktu ramana wapat, ari ibuna Nyi Raden Nimbang putra Patih Raden Aria Bandajoeda. Kiwari Raden Soeriadipradja katelahna ku urang Sumedang “Dalem Rancapurut”, ari Dalem Adipati Soerialaga II, disebutna “Dalem Talun”, sabab bumen-bumen di Talun.

Para putra Sumedang nu kacarioskeun lolos ka Cianjur, aya opatan, nya anu kaopatna Pangeran Kornel. Ti waktu ahir baleg Pangeran Kornel jenenganana teh Soerianagara bae, kakara dilandi nampi gelaran pangeran, malah mah dina Babad Sumedang nu kahot mah disebatna mantenna teh Pangeran Soerianagara.

Para putra Sumedang nu opat tea, jengkarna ka Cianjur nilarkeun bali geusan ngajadi, waktos Sumedang dibupatian ku Raden Adipati Tanoebaja II, sarta ngumbara ka Cianjur teh lantaran ngaraos kalindih ku putra cikal Dalem Adipati Tanoebaja II, nu kakasihna Raden Poeranagara dumeh mantenna diangkat kana Patih Sumedang ngagentos Raden Anggakara, putra Pangeran Karoehoen nu sami-sami nunuhun ka Kumpeni sareng Raden Tumenggung Patrakoeseoemah I mundut diangkat kana Bupati Sumedang dina taun 1775.

Raden Poeranagara garwaan ka Nyi Raden Jogjanagara, ari Raden Soerianagara ku Dalem Adipati Tanoebaja II dipulung mantu ditikahkeun ka Nyi Raden Tjandranagara. Tah ieu garwa Raden Soerianagara nu ditilar lolos ka Cianjur teh, nuju bobot cenah.

Nurutkeun seratanana ku anjeun Raden Soerianagara jeneng Kapala Cutak (Wadana pangkat ayeuna) Cikalong (Cianjur) teh taun 1788, sawapatna Bupati Kampung Baru jeung Cikalong: Raden Tumenggung Wiranatanagara, nu kapernah ka Raden Soerianagara putu mantu, sabab Raden Soerianagara dipangumbaraan kagungan deui garwa ka Nyi Raden Lenggang Koesoemah putra kawalon Aria Rangga Gede Bupati Kampung Baru (Buitenzorg). Jadi mun kitu Raden Soerianagara teh di Cikalongna ngagentos mertua kawalon, sarta nampi gelaran “Aria”, nu matak dina VAS 1937 M ditulis : Raden Aria Soerianagara Kapala Cutak Cikalong. Dina bulan Februari 1791 dialihkeun ka Sumedang, diangkat kana Patih, nampi gelaran “Demang”. Ieu caritaan ditulis dina surat laporan tuan Komisaris Guitard jeung tuan Komisaris Nicolaus Engelhard.

Ku bisluit Kumpeni (resolutie) tanggal 30 December 1791, meneran poe Jumaah ditetepkeun Raden Demang Soerianagara nu disebut Regent kadua (Patih) diangkat kana Regent kahiji (Bupati) di Sumedang, nampi gelaran “Tumenggung”. Ari Regent kahijina Raden Aria Satjapati (Sacapati III) diturunkeun deui kana Regent kadua (patih) di Sumedang.

Anu kakocapkeun deui lolos ti Sumedang teh nya Dalem Talun, nu keur murangkalihna nelah “Asep Ema”, terus dilandi Raden Soerialaga II, ngalap jenegan ramana. Mantenna samemeh diangkat kana Regen Bogor (Bupati Kampung Baru) numutkeun seratanana dina Staat van dienst anjeunna nyepeng rupi-rupi kapangkatan jaman harita, malah taun dibabarkeunana oge ditulis dina eta seratan, nya di taun 1768.

Dina bulan Maart 1782 jadi juru tulis kabupaten Cianjur, ngarangkep jadi “tukang mariksa buah kopi” (Kumetir). Bulan Mei 1786 nyepeng Gudang Kopi di Bogor, bulan Juli 1793 mulih ka Sumedang diangkat kana Patih sarta nampi gelaran “Rangga”. Taksiran bae, mantenna ngagentos Patih Aria Satjapati nu diturunkeun tea. Mantenna garwaan ka putra Pangeran Kornel nu ti Raden Ayu Tjandranagara, jenenganana Raden Ayu Radjanagara.

Ari titi mangsa serat angkatan Raden Tumenggung Soerianagara kana Bupati Sumedang (acte van aansteling) tanggal 15 Maart 1792. Sumedang mimiti di bupatian ku mantenna kacida pisan ruksakna; hutang kabupaten aya 83283 real, para priyayi taya nu getol, malah kaum santri mah kabina-bina kedulna teh, nepi ka masigit rerencepan dipiwarang dihuru supaya kaum santri kapaksa kudu digawe, ngadegkeun deui masigit. Nya kitu deui kebon kopi Nagara nu tadina henteu kapiara teh, ku jasa raden Tumenggung Soerianagara jadi beres kapiara, leungit bala bubudna.

Barang ku Tuan Komisaris Nicolaus Engelhard dironda deui bulan Agustus 1793, kabuktian maju, kaciri hadena Kabupaten Sumedang teh, nepi ka tuan Komisaris unjukan ka tuan Besar Gupernur-Jendral Mr.Willem Arnold Alting dina seratanana ping 25 Augustus 1793, anu dina basa Sunda kieu pikecapeunana :

“Kabupaten Sumedang nu sakitu dimomorekeunana, sasat dibongkorkeun ku Bupati anu parantos dilepas sarta dikendangkeun ka Batawi, Adipati Tanoebaja tea, nu teras digentos ku nu nembe diturunkeun kana patih Raden Aria Satjapati (Satjapati III), ayeuna saparantos diparentah ku Bupati Sumedang Raden Tumenggung Soerianagara, kalintang majengna dugi kakenging dipapandekeun, asal leuweung jadi sawarga, ku jisim abdi parantos dibuktikeun kalawan gemet pisan.”

Dina tutup taun 1793, hutang nagara Sumedang turun jadi 76103 real sarta ku bisluit Kumpeni tanggal 17 December 1793, diputus yen kapala-kapala jeung priyayi-priyayi lemah Sumedang moal diganti, ngan ku Bupatina kudu diperih sina leuwih getol digarawena.

Ku surat tanggal 4 Juli 1795, tuan Komisaris Nicolaus Engelhard unjukan deui ka Tuan Besar: “Ngan Bupati Sumedang, ti antara para Bupati Priangan, anu tara sungkan ngaprak ka pilemburan nitenan tatali hurip rahayat sareng ngamajengkeun pisan kana kebon-kebon kopi Nagara”.

Raden Latip, putra Bupati Pamanukan jeung Pagaden : Ngabei Wangsatanoe (Wangsatanu) (nu dikendangkeun ka Batawi ku putusan Pamarentah, resolutie tanggal 10 Februari 1792), geus digadangkeun ku Kumpeni pikeun ganti ramana, tapi lantaran tacan sawawa diwakilan ku Bupatii Ciasem Aria Kartajoeda (Kartayuda). Ku sabab teu beunang diurus pangapingna, Raden Latip ku Pamarentah dipindahkeun ka Bupati Sumedang Tumenggung Soerianagara jeung kakawasaan Aria Ciasem bakal dicabut nguruskeun kabupaten Pamanukan katut Pagaden, nu rek dijieun bawahan Sumedang ku resolutie 31 Mei 1796.

Ku putusan tanggal 20 November 1798 Raden Latip hakna kana digadangkeun Bupati Pamanukan-Pagaden, ku Kumpeni ditarik deui sarta eta kabupaten diburak, dijieun cutak bawahan Sumedang. Ku bisluit ieu keneh Bupati Sumedang dileler gelaran “Adipati” sarta ditetepkeun dina akteu tanggal 20 November 1798.

Ku surat putusan Pamarentah 9 April 1799, Bupati Sumedang Adipati Soerianagara kapapancenan nampi sakabeh sambetan nagara ti Adipati Tanoebaja (Dalem Patuakan) seueurna aya 27720 real.

Kumpeni digantina ku Pamarentah Nagara (Staat), nu saterusna nangkes sagala kaayaan rayat jeung tanah Hindia, nya eta dina tanggal 31 December 1799 atawa dina 1 Januari 1800. Hal ganti Pamarentah teh ku urang Pribumi katut kapala-kapalana teu pati karasa jeung kanyahoan, numatak tetep bae nepi ka ayeuna aya keneh urang Sunda nu nyebut Pamarentah te h“Kumpeni”.

Ku bisluit 11 April 1801 Papatih kadua Sumedang Raden rangga Soerialaga, nu ngagentos patih Aria satjapati, ku lantaran geus nguruskeun gudang beas di tanah Pamanukan, waktu kota batawi di pakung, ditutup palabuanana ku armada Inggris, kapapancenan ngirim beas-tedaeun ka Batawi, nya ku lantaran jasana ieu raden Rangga Soerialaga, diangkat kana Bupati Kampungbaru (Buitenzorg) kalawan nampi gelaran “Aria”, jujuluk Raden Aria Soerialaga.

Bupati Parakanmuncang Raden Adipati Soeria Nata Koesoema II, ti Pamarentah nampi sesendu pohara pisan nepi ka tina Regen Parakanmuncang dicopot terus dikendangkeun ka Batawi, linggih di kampung Krukut dugi ka wapatna, nu matak nelahna kiwari “Dalem Krukut”. Ari Kabupaten Parakanmuncang ditarik dihijikeun jeung Sumedang, di bawah ku Bupati Sumedang Raden Adipati Soerianagara, ngan heunteu diburak bae, tetep jadi kabupaten, malah ku bisluit tangggal 16 April 1809, Patih Parakanmuncang Raden Poeranagara, putra Dalem Patuakan, nya dahuan Bupati Sumedang Raden Adipati Soerianagara, diangkat kana Bupati Parakanmuncang, gentos jenengan Raden Tumenggung Wira Tanoe Redja.

Dina taun 1802, mimiti timbul karusuhan-karusuhan di tanah Cirebon jeung karawang, malah ti wewengkon kabupaten Sumedang oge, loba rahayat Sumedang nu kabaud milu ngaraman. Repehna ieu kaributan dina taun 1818 M, sanggeusna rusuh di Palimanan nu diluluguan ku Bagus Serit nu dihukum gantung dina 17 November 1817 sarta Bupati Bengawan-Wetan Raden Adipati Nitidiningrat, nu yuswana langkung ti 70 taun kasambut di medan perang. Nya ti harita tug nepi ka ayeuna di wewengkon Sumedang euweuh rusuh nu gede.

Anu jadi sabab pangna ngadeg ieu karaman nu jadi babaku lantaran tanah-tanah di Cirebon disewa-sewakeun ka urang Tionghoa: ku hal ieu rahayat kacida ngarasa digencetna katambah abdi-abdi dalem milu sedih. Lantaran Pangeran Raja Kanoman, Pangeran Pabupaten jeung Pangeran Lautan dikendangkeun ka Ambon. Ari rahayata nu milu ngaraman kira-kira aya 40000 jiwa, pakarangna bedil nepi ka mariem oge dipake merangan prajurit para Bupati jeung soldadu Gupernemen. Kapala rampog pangkahotna dina taun 1806, nyaeta :

1. Bagus Sidoeng (Sidung) asal ti Sumber. 

2. Bagus Arisem asal ti Bojong

3. Bagus Soeara ti Bantarjati

4. Bagus Sanda ti Palimanan

5. Bagus Narim ti Lelea

6. Bagus Jamani ti Depok

7. Demang Benangan ti Kandanghaur

8. Demang Wargagoepita ti Kuningan.

9. Demang Wargamanggala ti Cikao

10. Wirasraja ti Manis

11. Djoelangprawira ti Linggajati

12. Djajasasmita ti Ciminding

13. Djangbaja ti Luragung

14. Harmanisti Cikao

15. Anggasraja ti Timbang

16. Demang Djajaprawata ti Nagarawangi

17. Demang Angonklangon ti Waru

18. Ngabei Martamanggala ti Pagebangan

19. Demang Djajapratala ti Sukasari, jst

Mimiti kajadian aya barandal nu ngarusuhkeun dina tanggal 22 Februari 1806 di kampung Panongan, wates Sumedang jeung Cirebon (Majalengka). Ari Bupati Sumedang perangna teh di Nagara, di Talaga, di Lumbung, di Karangsambung, di Pamanukan, di Kandanghaur : dina Babad Sumedang mah ieu teh katelahna “Perang Bantarjati” atawa “Perang Jatitujuh”.

Dina taun 1805 aya surat aksara Sunda ti Dalem Adipati Soerianagara ka tuan Komisaris Pieter Engelhard nu kieu unina :

"Wonten wadana saking cutak Conggeang wastana pun Baen nging midanget warti, yen wonten kang dipun ngrangket ing Sumedang (Patinggi Cipicung), dados kaget manahipun, sarencange sami pradara, sadanten gungipun wonten 77 titiang milanipun klambeke pradara, sawah rumiyinipun tuan Lawik (Lawickvan Pabst Adjunct –Commisaris) – sampun angrangke dateng pun Baen punika. Dados kaget manahipun kongsi pra dara dateng siti Grage (Cirebon) ing deukeuh Sukawana, rencangipun ing deukeuh Pangumbahan”.

Pangna aya karusuhan sakuliah Cirebon, nu ngarembet ka Sumedang tea, sabab paparentahan nagara jaman harita bengis kabina-bina, nepi ka hiji wadana mabur milu ngaraman. Turug-turug tuan Komisaris Lawick van Pabst kakoncara pisan ganas katambah barangasan nu matak loba nu baha ka Nagara.

Ayeuna rek malikan deui carita nu pacantel jeung kaayaan Kabupaten Sumedang, nu nyabit-nyabit kana carita karusuhan, saperti anu ditulis dina bisluit tanggal 15 Februari 1805, yen Patinggi Cipicung bawahan Sumedang lantaran ngabaekeun kana taneman kopi Nagara sarta perkara jepit di Dayeuh Sumedang, dihukum rangket terus dibuang digawekeun kerja paksa pikeun 5 tahun ka Tanjungpura.

Bupati Parakanmuncang nampi pepeling sareng panyeukseukan sarta diancam bakal nampi hukuman lantaran parantos teu kersa tumut kana parentah Nagara, supados kersa melak kopi 300.000 tangkal di gunung Manting, bawahan Cutak Manabaya, nu jiwana 700 kuren jaba ti eta lantaran gasab. Disuhunkeun ku tuan Komisaris Pieter Walbeeck, Pieter Herbertus van Lawick van Pabst, dirujukan ku Carl Wilhelm Thalman - Voorzitter pamariksaan tanah Priangan, George Frederick Smit - Lid Commissie pamariksaan tanah Priangan, supaya Bupati Parakanmuncang Raden Tumenggung Wira Tanoe Redja dilepas tina pangkat Regen Parakanmuncang sarta dikendangkeun ka Batawi, dicalonkeun pikeun gantina, putra Bupati Sumedang pangbarepna, Kapala Cutak Pamanukan Raden Adiwijaja (Adiwijaya) sareng Raden Wiradiredja Kapala Cutak Cilolohan di Kalumpang.

Ku bisluit tanggal 14 Januari 1806 ditetepkeun nu diangkat kana Bupati Parakanmuncang sarta nampi gelaran “Aria”, nya eta Raden Aria Adiwidjaja. Ari Tumenggung Wira Tanoe Redja dikendangkeun ka Batawi sarta raja-kaya pusaka kabupatian Parakanmuncang dirampas ku Nagara. Satadina anu dipundut ku tuan Komisaris Lawick van Pabst mah Bupati Kampung-baru Tumenggung Soerialaga, pikeun Regen Parakanmuncang teh, ngan nanduk teu kersaeun.

Nurutkeun laporan Komisi pamariksaaan tanah Priangan, nu diluluguan ku tuan Thalman tea, dibantu ku tuan Smith sarta disekretarisan ku tuan Johan Joseph Aloysius Bauer tanggal 29 Januari 1808, upama dina basa Sunda mah kieu pikecapeunana :

"Bupati Sumedang nu ayeuna Adipati Soerianagara, geus teu hamham deui nyaritakeun, nu pangpercekana, pangpinterna sarta panggetolna ti sakabeh para Bupati, tigin nohonan kawajiban satia-tuhu ka Kumpeni, nyaah ka bangsa Walanda, uninga pisan sarta seueur luangna tina hal taneman kopi, raka (saderek) Bupati Buitenzorg nu ayeuna, rama Bupati Parakanmuncang, sarta mertua Bupati Bandung, ku sadayana kabina-bina dihormatna sarta jadi panarosan, ku sabab lain ngan lantaran wijaksana bae, tapi tedak wargi para Bupati Priangan nu nomer hiji."

Mantenna di Bupati Cianjur anu ayeuna, kantos jadi juru tulis, teras jadi Kapala Cutak Cikalong-Cibalagung, nu ku marhum Komisaris Guitard diangkat kana Patih Sumedang, ku Gupernur Tanah Jawa ayeuna, nalika mantenna jadi Komisaris Tanah Priangan (Preangersche Bovenlanden) tuan Nicolaus Engelhard, diangkat kana Bupati Sumedang.

Sumedang teh hiji kabupaten nu ngawates ka Cirebon sarta lebah Pamanukan mah ka laut, nu waktu sakurilingna nuju sakitu gugujrudanana sarta karusuhanana, sasat dilingkung ku penjahat bae, tapi taya deui kabupaten nu aman cara di Sumedang.

Sajabana kudu nguruskeun militer nu lalarliwat ti Batawi ka Cirebon, nya tedana soldadu, nya keur kudana. Jagaan ditapel wates kabina-bina tohagana, sanajan loba mata-mata panjahat nu bisa asupoge ka wewengkon Sumedang, meh kabeh bisa katewak.¬(Buktikeun bundel 3/7 Jacatra Priangan).

Naon pamundutna ka Pamarentah, nu jalan ka Komisi tuan Thalman, geura ieu, ku basa Malayu ditulis saceplesna :

• Perkara, minta kopi turun di Karangsambung.

• Perkara, minta brenti dua atawa tiga taun tanem kopi.

• Perkara, minta Cinengah, Sagalaherang masok di Sumedang, sabab dulu masih ada di tangan tuan Sultan Kanoman, kalau orang bawa kopi di Gintung dari Sumedang atawa Parakanmuncang dia punya binatang yang tarik kopi, di situ sering dicuri atawa dirampog, sekarang hamba pegang orang jahat suda ilang. Kalu sudah abis dia punya perjangjian, tuan Sultan Kanoman dapet kembali itu tanah.

• Perkara, hamba minta dagang kerbau di Batavia.

• Perkara, hamba minta Tumenggung Wira Tanoe Redja yang dari Parakanmuncang biar pulang dari Batavia, hamba kapengen kumpul sama sudara, mau dipiara di Sumedang sajah; jikalau Tuan Orang Besar trada percaya, barangkali kerja istori, hamba pikul.

• Perkara, hamba minta order, jangan dilarang. Kalu opziender ada jual barang-barang sama diapunya Regent dan Kapala-kapala, karena susah kalu trada barang-barang buat prabot tatamu, salamanya misti opziender yang tulung bli apa-apa di Batavia sabab Kapala-kapala trada milir sendiri

• Perkara, hamba minta opziender Sassee angkat nama Boekhouder;

• Perkara, hamba minta akte Papatih bernama Mangkoepradja (Mangkupraja), yang hamba angkat di taun 1803 sampe sekarang blon dapet akte dan cap, dia punya pakerjaan sampe baek.

Tertulis hari Jumaat 23 hari bulan Rajab taun 1222/1807. Ieu serat ditawis “Soerianagara”.

Kapaksa malikan deui carita, sakumaha anu geus dicaritakeun diluhur, supaya tetela, nalika di Cikalong, Dalem Adipati Soerianagara garwaan ka putra kawalon Bupati Bogor Aria Rangga Gede ti garwa Raden Lenggang Nagara, putra Bupati Bogor Tumenggung Wiranata Nagara, putu Bupati Cianjur Aria Wiratanoe Datar dicondre. Dalem istri Lenggang Kosoemah  ti Dalem Adipati Soerianagara kagunagan putra tilu : Cikalna kakasih murangkalih “Asep Abdoel” nu di taun 1797-1801 jadi Kapala Cutak di Conggeang, ti taun 1801 nepi ka taun 1806 di Pamanukan.

Nya di taun 1808 ngasta kabupaten Parakanmuncang, jujuluk Raden Aria Adiwidjaja. Ari putra nu panengah istri, jenengan murangkalih Nyi Raden Adjeng, waktu taun 1808 carogean ka Bupati Bandung Dalem Adipati Wiranata Koesoemah (Dalem Kaum nelahna kiwari). Nu panganomna putra ti Dalem istri Lenggang Koesoemah teh, kakasihna Asep Ewok, ana dilandih Raden Somanagara, di taun 1804-1806 jeneng Houp kumetir kopi di Sumedang, taun 1806-1807 jadi Kapala Cutak Pamanukan, nu waktu di Pamanukan katerka nelasan urang Tionghoa, nu matak dialihkeun ka Cipicung sarta di taun 1808 tetep jadi Kapala Cutak Cipicung.

Tuan besar Maarschalk Mr. Herman Willem Daendels dina 14 Januari 1808 jumeneng Gupernur Jendral, Pamarentah tanah Hindia, nya kitu demi pulo Jawa gede kapangaruhanana ku urang Parasman, malah jaman harita disebut jaman kapurba ku Bangsa Parasman.

Talapakan tuan Besar Maarschalk Daendels, nu nepi ka kiwari jadi catur, nya eta tina hal nyieun jalan gede ti Anyar ka Banyuwangi. Ari anu rek didongengkeun di dieu mah, ngantina perkara meresan jeung ngalegaan jalan ti lebah Parakanmuncang, Tanjungsari atawa Ujungberung nepi ka Karangsambung bae, ari anu saestuna mah, Tuan Besar Maarschalk Daendels lain miwarang naratas nyieun jalan anyar, tapi ngahadean jalan heubeul, supaya gampang dipake liwat ku rupa-rupa tutumpakan, saperti kareta jstna.

Nurutkeun bisluit nu marentah mah nyieun jalan, diserat ke tuan Besar Maarschalk Daendels teh titimangsana tanggal 15 Mei 1808, sasumpingna ka Cirebon atawa Tegal, saparantos ngalangkung ti Sumedang. Bawaning jalan Parakanmuncang – Sumedang sakitu tarahalna jeung gorengna, nepi ka Maarschalk tea, ti Parakanmuncang ka Sumedang kapaksa nitihan tandu atawa kadera. Dina bisluit anu kasebut bieu, ngahadean jalan anu tarahal teh nyaeta ti lebah Cisarua nepi ka Cianjur jeung ti lebah Parakanmuncang nepika karangsambung dipigawena kalawan panalingaan genieofficier (opsir tina balatantara nu purah nyieun jalan katempat pangperangan, purah nyieun benteng jeung rupa-rupa adegan militer, tegesna mah soldadu patukangan) jeung dua onderofficier.  Tuan Komisaris kapapancenan memeres jalan gede antara ieu anu dua tempat tea, ari anu jadi bupati-bupati dibantu ku tuan-tuan opsinder kopi, kudu ngamandoran pagawean ngurus jalan anu biasa bae. Ana kitu atuh jalan gede antara Parakanmuncang jeung karangsambung teh beunang militer, nu matak osok disebut jalan militer.

Dina tanggal 2 October taun 1808 aya sarebu urang Cirebon nu digawekeun nyieun jalan militer antara Parakanmuncang jeung Karangsambung. Antara Cipeles jeung Cikaramas di lebah Simpang, nu kacida tarahalna jalanna dipindahkeun. Di bulan Maart 1820 dipigawena. Dipindahkeun deui jalan teh di lebah Ciherang kasebut Pola atawa Sarongge dimimitian dipigawe, dina bulan Juni 1820 diluluguan sarta ditalingakeun ku Bupati Sumedang ku anjeun, sarta dina ngabobok Cadas pangeran ku obat bedil lain ku dinamit kawas ayeuna, ngahaja diluluguanana ieu pagawean ku tuan Residen Priangan ku anjeun nyarengan Bupati Sumedang, dimandoran ku Patih Sumedang Raden Demang Mangkoepradja.

Dina sela-sela cadas anu nangtawing jalan gede teh diliwatkeunana sarta dina cadas sabeulah ti kenca, upama urang ti Sumedang ka Tanjungsari leumpang, di lebah Cadas Pangeran aya tugu tembokan tina marmer ditulis kieu :

"onderleidingvan Raden Demang Mangkoepradja en onder toezicht van Pangeran Koesoemah Dinata,Aangelegd 1821. Doorgekapt van 20 Nov tot 12 Maart volg.

Pisundaeunana kieu :

"Ieu pagawean diluluguan ku Raden Demang Mangkoepradja sarta ditalingakeun ku Pangeran Koesoemah Dinata (Pangeran Kornel). Dijieun taun 1821. Dibobok ti tanggal 20 November 1821 nepi ka 12 Maret 1822."  

Ku tuan Residen dijajal diliwatan ku kareta dina tanggal 20 Februari 1822. Dina tanggal 29 Juli1822, tuan Residen Priangan sareng saderek tuan Besar Gupernur Jendral Baron Van der Capellen nitihan kareta ngalangkung ka lebah Cadas Pangeran, nya harita dicobana eta jalan teh. Kiwari jalan lebah dinya geus dipindahkeun deui ka tebeh lebak. Tah sakieu dongeng nyieun jalan lebah Cadas Pangeran teh.

Tuan Besar Maarschalk Mr.H.W. Daendels, Gupernur Jendral tanah Hindia, nalika roronda di Surabaya dina tanggal 1 Juli 1809 ngadamel bisluit, Bupati Brebes Mas Tumenggung Poesponegoro dilirenkeun lantaran sepuh sareng ririwit, gantina kana Bupati Brebes nya eta Bupati Krawang Adipati Singasari Panatajoeda sarta dialihkeun, Regen Tangerang Aria Soetadilaga. Sadayana kalawan ngagem keneh jenengan jeung gelaran nu kasebut bieu.

Bupati Tangerang Aria Soetadilaga nembe dilungsur tina pangkat Regent Tangerang, lantaran Kabupaten Tangerang diburak, tanahna dijual ku Pamarentah, jadi tanah partikulir. Tapi Aria Soetadilaga ku pamarentah dipaparinan tanah, jadi Dalem Aria Soetadilaga teh sasat jadi tuan tanah. Ku sabab eta mantenna nanduk, teu kersa diangkat deui kana Bupati Krawang.

Ana jol putusan Pamarentah bisluit tanggal 29 Augustus 1809 Kabupaten Krawang dibagi dua, sakuloneun Citarum asup ka bawahan Landdrost Batawi, ari sawetaneunana katarik ka wewengkon Sumedang dibupatian ku Dalem Adipati Soerianagara.

Ku bisluit 1 Juli 1809 keneh, dileler gelaran Adipati, para Regen Bogor, Tegal, Lasem jeung Bangil, nya kitu deui regen kahiji Japara jeung Regen kadua Surabaya, kusabab eta Raden Adipati Soerialaga. Ku putusan Pamarentah (resolutie) 7 September 1809 Raden Somanagara, putra Bupati Sumedang, Hupkumetir kopi kabupaten Sumedang, dileler gelar Aria.  Ku bisluit 21 April 1810, putra Bupati Bogor Adipati Soerialaga : Raden Soerialegawa dileler gelaran Aria.

Ku lantaran aya jalan anyar beunang ngahadean jeung ngagedean tea, dayeuh Bandung dipindahkeun ti Dayeuh Kolot ka sisi jalan gede lebah sisi Cikapundung, ari dayeuh Parakanmuncang dipindahkeun ka kampung Anawedak. Bareng jeung dipindahkeunana eta dua dayeuh dina sabisluit keneh tanggal 25 September 1810 diangkat kana Patih Parakanmuncang Raden Soeria (Suria), Patinggi Cipacing ngaganti Raden Wirakoeseoema, nu dilirenkeun lantaran kurang cakep jeung kedul.

Dina taun 1811 nagara Walanda dijieun bawahan Frankrijk (Parasman), jeung tanah Hindia jadi jajahan tanah Parasman, sarta dina tanggal 16 Mei 1811 tuan Besar Gupernur Jendral Maarschalk Mr. Herman Willem Daendels papasrahan mulih ka Eropa, lantaran disaur ku Keizer Napoleon, Raja Parasman. Samemeh tuan Besar  Daendels nu katelah tuan Besar Guntur (bawaning ku barangasan), nilar pulo Jawa ku bisluit tanggal 2 Maart 1811, ngadamel heula aturan anyar, nya eta kabupaten Limbangan jeung Sukapura diburak, wewengkonna dibagikeun jeung ditambahkeun ka 4 kabupaten : Cianjur, Sumedang, Bandung, Parakanmuncang.

Bupati Limbangan harita Raden Tumenggung Wangsakoesoemah, nu diangkat ku Surat Pamarentah tanggal 9 April 1805, kakasih keur murangkalih Raden Arwa, diangkat kana Bupati Limbangan tacan sawawa diaping sarta bakal ngagentos eyangna Raden Adipati Wangsaredja, jujuluk Raden Tumenggung Wangsaredja, ngan dina tanggal 23 November 1808 mundut dilandi Raden Tumenggung Wangsakoeseoemah, ngalap jenengan rama nu ngasta Kabupaten Limbangan mung 8 sasih.

Bupati Sukapura nu dipansiun 400 real sataun, sarta kaidinan linggih di Sukapura, ngan teu kenging damel naon-naon tina hal aturan Nagara, nya nu jenengan Raden Tumenggung Wiradadaha, angkatan kana Bupati Sukapura tina Raden Demang Anggadipa, teu lami dina waktu ramana Raden Adipati Wiratanoebaja I pupus dina tanggal 30 December 1807. Nu saban taun kapapancenan mayaran pansiun nu dua bupati tea, nya eta Bupati Cianjur 40 real, Bupati Sumedang 330 real, Bupati Bandung 250 real Bupati Parakanmuncang 180 real, jumlah keur pansiun duaan teh 800 real.

Sanajan Sumedang leungit wewengkon basisir oge, nyaeta Krawang, tapi nu jadi Bupati Krawang harita Bupati Bogor Raden Adipati Soerialaga dialihkeun ka Krawang sarta bakal dipiwarang nyusuk walungan Citarum nepi ka Cikao jeung padaleman kabupaten Krawang teh harita pernahna di Kandanghaur, nurutkeun bisluit tanggal 8 Maart 1811.  Demi pangna wewengkon Krawang diatur kieu, lantaran Sumedang lega teuing bawahanana, teu kasiwer, jadi tempat panyumputan kapala barandal nu ngaran Bagus Rangin.

Ieu aturan tuan Gupernur Jendral Daendels teu lila, sabab dina tanggal 18 September 1811 keneh, pulo Jawa dijabel ku Inggris nu ngalindih Pamarentah Parasman di dieu. Nu jadi Gupernur Jendralna harita, gaganti tuan Daendels nya eta tuan Besar Jan Willem Janssens. Jendral perang  Keizer Napoleon, dibarengan ti Eropa ku Jendral Jumel, nu dicalonkeun pikeun jadi Kapala Balatantara tanah Hindia (Legercommandant).

Dina tanggal 4 Augustus 1811 ka palabuan Batawi, kiwari mah lebah Pasar-ikan, datang armada Inggris anu rek ngarurug, aya kira-kira 100 kapal perang, nu diluluguan ku Gupernur Jendral Hindustan (Hindia Inggris) di Banggala, disarengan ku Jendral Auchmity, nu jadi senapati jeung ku Kolonel Gillespie, diiring ku hiji amtenar Inggris nu jenengan Thomas Stamford Raffles. Nya anjeunna pisan nu sasatna meredih ka tuan Besar Lord Minto oge, supaya pulo Jawa ku Inggris dijabel teh. Ku sabab eta anjeunna pisana nu diangkat jadi tuan Besar di pulo Jawa, jadi patakana pamarentah Inggris didieu, kalawan dibantu ku hiji rengrengan (Raadvan Indie) Hindia, nu elid-elidna : 1. Kolonell Gillespie jeung 2 urang Walanda nyaeta tuan Cranssen jeung tuan Muntinghe. Pangkatna tuan Besar Raffles teh disebut Lieutenant Gouverneur: urang sebut Leknan Gupernur tanah Jawa.

Sakumaha nu ditulis dina serat undang-undang Gupernemen Inggris, nu disebut “Proceedings” tanggal 23 November 1811 di karaton Bogor ku tuan Besar Raffles diayakeun pasamoan para Bupatii tanah Jakarta  Preanger -Regent schappen dina poe Salasa tanggal 13 November 1811, nampi sumpah kasatiaan para Bupati ka raja kalawan Gouvernement Inggris, sarta maparinkeun surat pangangken papurba kukakawasaan Inggris. Ieu pasamoan dipestakeun, dipestakeun make nyeungeut mariem sagala, disebutna “openbare receptie”.

Para Bupati harita nu ngaluuhan, nyaeta :

1. Regent Cianjur Kyai Adipati Wiratanoedatar

2. Regent Bandung Adipati Wiranata Koesoemah

3. Regent Parakanmuncang Tmg. Adiwidjaja

4. Regent Limbangan Tumenggung Wangsakoesoemah

5. Regent Sukapura Tumenggung Wiradadaha

6. Regent Sumedang Adipati Soerianagara

Ari pangageng bangsa Eropa ku Pamarentah Inggris diatur kieu di Bogor Landdrost (Residen) tuan Hartsinck; di Cianjur Commissaris tuan Couperus, di Bandung Commissaris tuan Tency.

Dina surat tanggal 9 Januari 1812, tuan Besar Raffles nimbalan tuan Couperus, Komisaris di Cianjur, supaya ngumpulkeun 500 prajurit ti kabupaten Cianjur nu diluluguan ku Bupatina, iangkeuneun ka Krawang pikeun nempuh barandal nu diluluguan ku Bagus Rangin. Amtenar Eropa anu jadi Kapala di Krawang harita, tuan Tency jeung tuan Offers. Komisaris jeung Landdrost pangkatna.

Sajaba ti anu 500 prajurit urang Cianjur nu nempuh balad Bagus Rangin teh, nya barisan (soldadu) Pangeran Prangwadana (Mangkunegara) Solo, anu dikumendir ku dua pangeran, nyaeta Pangeran Majoor (Mayor) Soerianagara jeung Soeriadipoera.

Bupati Krawang oge nu disebut Regen Kandanghaur, nya Dalem Adipati Soerialaga sabaladna kacida gede jasana sarta oge kungsi prung tarung di tetelar Bantarjati keneh bae dina tanggal 16 nepi ka tanggal 29 Februari 1812 jeung balad Bagus Rangin, sarta harita perangna Bagus kateter, ngan manehna henteu katangkep ku Dalem Adipati Soerialaga, bisa keneh ngejat ka bawahan Cirebon. Batur Bagus Rangin anu kasambut dina ieu perang aya 87 jiwa, dua kapalana jeung anu kaboyong aya 227 tia ntarana aya 30 jalma anu biluk pisan ka Bagus Rangin. Katambah ku 776 awewe jeung budak anu katewak, nu salakina jeung bapa barudak nu milu ngaraman. Pakarang anu beunang 23 bedil, 19 tumbak, 27 kolewang atawa bedog jeung 3 keris, ti dinya Payung-agung Bagus Rangin jeung parabot wayang sapuratina nu milu karampas teh. Kulantaran jasana sarta wawanen Dalem Adipati Soerialaga, ti pamarentah Inggris diganjar hiji bedil pamoroan anu alus pisan, beunang nyieun urang Inggris ku maneh.

Nurutkeun daptar papariksaan, Bagus Rangin dina proceedings tanggal 22 Juli 1812, pangakuanana sorangan, katangkepna Bagus Rangin teh di kampung Panongan (di jero kabupaten Majalengka) bawahan Tumenggung Rajagaluh-Sindangkasih, ditewakna ku Bupati (patih) eta kabupaten nu kakasihna Raksajoeda, dibantuan ku mantri Sultan Kanoman Djajagana jeung saurang pagawe pulisi wasta Ranadewangoe.

Ceuk pangakuan Bagus Rangin, manehanana leuwih ti 6 1/2 taun jadi kapala barandal nepi kana waktu katangkep di Panongan dina tanggal 27 Juni 1812. Malah waktu perang di Panongan jeung Bantarjati oge dina taun jeung prajurit Bupati Sumedang jeung Cirebon, nya Bagus rangin gegdugna, baladna aya kira-kira 280 atawa 300 jalma lalaki nu barisa perang, pakarangna jaba titumbak, gobang, bedog jeung keris teh, bedil sarta nepi ka mawa mariem kalangtaka. Prajurit Sumedang jeung Cirebon nu harita (1806) kaboyong aya 25 jalma. Kabehanana ku Bagus Rangin dititah ditugel sirahna ku si Kadim urang Sumedang jeung si Rawu urang Sukawana.

Kampung-kampung nu ngabayuan Bagus Rangin mere tedana baladna, nyaeta Benawangkulon, Malandang, Tonggeang, Cililin, Depok, Selaawi, Sukasari jst. Ari kuwu –kuwu anu biluk keneh ka Bagus Rangin ti kampung Batununggal, Tegal, Bentang, Gerudu, Cinaka, Tanggulun, Tambal, Ayer jst. Nu ku balad Bagus Rangin diruksak jeung diranjah nya Cibingbin, 80 munding nu dipaling, kapalana dipaehan. Waktu katangkep, kapala barandal keneh ka Bagus Rangin aya 11 urang, nu ngabogaan pakarang 170 bedil jeung 52 kati obat.

Ku pamarentah Inggris, wewengkon-wewengkon kabupaten Krawang, Cianjur, Bandung, Sumedang, Limbangan, Sukapura, Parakanmuncang jeung Galuh ku bisluit tanggal 16 Februari 1813 diatur deui. Tanah kabupaten Krawang, lantaran rek dijual dijieun tanah partikulir, ku Pamarentah kaanggap teu perlu diayaan Regent.

Bupati Krawang Raden Adipati Soerialaga II dialihkeun ka Sukapura, ari Bupati di dinya Raden Tumenggung Wiradadaha dipansiun. Kabupaten Parakanmuncang diburak, dileungitkeun sama sakali.  Bupatina Raden Tumenggung Adiwidjaja dialihkeun ka Limbangan, dayeuh Garut, nu kakarapisan diadegkeun, pernahna di cutak Suci, nu satadina kabawah ku Sukapura; Bupati Limbangan Tumenggung Wangsakoesoemah dipansiun.

Regen nu dilirenkeun, nu katiluna Bupati Galuh Raden Tumenggung Djajengpati (Jayengpati), saurangna 600 real sataun, ieu pansiun kudu dibayar ku Bupati Sukapura jeung Bupati Sumedang 800 real, jadi 400 real sewang; ku Bupati Limbangan jeung Bupati Bandung 1000 real, saurangna kapapancenan 500 real. Cutak Pagerageung kabawahna ku Sumedang ti semet taun 1813.

Bupati Cianjur Dalem Adipati Wira Tanoe Datar (Dalem Enoh), nu dina buku-buku babad Sumedang kamashurkeun pisan, miasih ka Dalem Sumedang Adipati Soerianagara, nalika mantenna di Cianjur, dina poe Jumaah tanggal 2 April 1813 pupus, nilar tilu putra pameget. Nu pangsepuhna Raden Aria Wiranagara, kakoncara gangas, nelahna mah Aria Cikalong; ari nu panengah Raden Aria Natanagara, nu sabada munggah haji jeneganana Haji Muhamad Tabri. Ari nu pangbureyna putra Dalem Dipati Enoh teh Aom Abas, waktu ditilar ku rama murangkalih yuswa lima taun.

Para putra Dalem Wira Tanoedatar (Enoh) teu aya anu kamanah ku Pamarentah Inggris, kusabab eta nu diangkatkana Bupati Cianjur ngagentos Dalem Dipati Enoh, Patih Cianjur, Raden Wiradiredja kalawan nampi gelaran Tumenggung, ku bisluit Pamarentah tanggal 18 April 1813. Satampina surat angkatan, mantenna gentos jenengan jadi Raden Tumenggung Prawiradiredja.

Ku bisluit Pamarentah Inggris (Proceedings) tanggal 28 October 1814, Bupati Sukapura Raden Adipati Soerialaga II, mundut liren lantaran rugel tina ngepak ngala remis, neangan mutiara di Sagara Anakan deukeut Nusa Kambangan, terus anjeunna mulih ka Sumedang, ka bali geusan ngajadi, kalawan dipaparin ti Pamarentah, panukang 100 kuren sarta kaidinan miara gulang-gulang keur upacara nu jadi Bupati pansiun, ti kabupaten Sumedang, laju anjeunna bumen-bumen di kampung Talun, nu matak nelah “Dalem Talun” nepi ka kiwari.

Raden Tumenggung Wiradadaha, Bupati Sukapura pansiun, ku bisluit tanggal 28 October 1814 diangkat deui kana Bupati Sukapura sarta tetep ngagem jenengan jeung gelaran Raden Tumenggung Wiradadaha.

Tanah Priangan jeung Galuh dibawah ku Karesidenan Bogor, harita Residenna tuan Macqoid, nu dina tanggal 10 October 1815 di Bogor, ngalih ka Wanayasa. Ari para Regen nu kaparentah Bupati Bogor (Kampung Baru): Raden Adipati Wiranata, Bupati Cianjur: Raden Tumenggung Prawiradiredja, Bupati Bandung: Raden Adipati Wira Nata Koesoema, Bupati Sumedang: Raden Adipati Soerianagara; Bupati Galuh (Ciamis) : Raden Tumenggung Wiradikoesoemah, Bupati Sukapura: Raden Tumenggung Wiradadaha, Bupati Limbangan: Raden Tumenggung Adiwidjaja, di Krawang acan aya Bupati, ngan Patih apdeling bae Raden Sastradipoera.

Dina taun 1816 tuan Besar Raffles nampi warti bakal digentos ku tuan Besar John Fendall jadi Leknan Gupernur pulo Jawa, nya teras ngabagikeun rupa-rupa gelaran ka para menak pribumi, ku maparin surat akte dina tanggal 1 Maart 1816, kayaning ka Bupati Limbangan Tumenggung Adiwidjaja gelaran Adipati, ka kapala Cutak Cipicung Raden Aria Somanagara gelaran Tumenggung. Putra Bupati Sumedang pameget nu ngan dua-duana teh, duanana ku tuan Besar Raflles diganjar. Bupati Cianjur Tumenggung Prawiradiredja nampi gelaran Adipati, Kapala Cutak Wanayasa Raden Anggadikoesoema diganjar gelaran Aria jadi Raden Aria Soeriadikara, kabeh titimangsa angkatan tanggal 1 Maart 1816 bae.

Perjangjian tanggal 13 Augustus 1814 di kota London tea, Inggris bakal mulangkeun bawahan walanda, kakara kacumponan dina 19 Augustus 1816. Nya harita bandera Walanda, nu tilu warna teh ngelebet deui di kota Batawi sanggeus ieu dayeuh tanah Hindia jeung kakawasaan Pamarentah Inggris ku tuan Besar Leknan-Gupernur pulo Jawa John Fendall dipasrahkeun ka Commissarissen-Generaalti Nagara Walanda, nyaeta tuan Besar Mr. C.Th. Elout, G.A.G.Ph. Baron van der Capellen jeung tuan Besar A.A. Buisjkes, nu sarumping kadieu dina tanggal 26 April jeung 11 Mei 1816. Ari tuan Besar Raffles nilar pulo Jawa dina tanggal 8 Maart 1816, terus jadi Gupernur di Bangkaulu (Benkoelen).

Sanajan kakawasaan C.C.G.G. tacan katampi oge, Residen Priangan tuan P.W.L. van Motmanenggeus diangkat ku bisluit tanggal 3 Augustus 1816, sarta dina tanggal 25 October 1816 ti Wanayasa tuan Residen van Motman nyanggakeun laporan ka Pamarentah Walanda nu anyar, tina hal kaayaan Karesidenan Priangan jeung Krawang di bawah parentahan Inggris sarta tina perkara kabupaten Sumedang, kieu unjukanana :

"Kabupaten Sumedang cangkinganana aya 15 distrik nyaeta: Balubur, Andawadak, Depok, Malandang, Conggeang, Darmaraja, Darmawangi, Pawenang, Malangbong, Ciawi, Pagerageung, Rajapolah, Indihiang, Cicariang jeung Singaparna diparentah ku Bupati Adipati Soerianagara, nu waktu ieu pangsepuhna sarta pangluhurna dina kapangkatanana sawewengkon karesidenan Priangan, anjeunna teh luar biasa pinterna sarta kacida satia tuhuna ka Gupernemen Walanda. Ieu kabupaten  diurusna kalawan geten tulaten pisan meh beunang disebutkeun pangamanna jeung meh euweuh panjahat, ku lantaran anjeunna sering ngeprik kapala leutik, sangkan getol digawena nohonan kawajibanana.  Anjeunna teh hiji Bupati nu sae manah, sareh sarta adil, bengis dina dines Gupernemen, abdi-abdi pada wedi asih lantaran tara nyusahkeun ka somah, kersana pamarentah kudu diturut nu hade pikeun maranehanana."

Kagungan putra pameget dua, nu pangsepuhna geus jumeneng Bupati di Limbangan, putra nu anom jadi wawakil ramadi Sumedang, gelaranana Tumenggung, nya eta Raden Tumenggung Somanagara. Ari putra pangsepuhna tea jenengan Raden Adipati Adiwidjaja, Bupati Limbangan nungabawah 6 distrik, nyaeta: Wanakerta, Wanaraja, Suci,  Panembong, Sudalarang jeung  Pasanggrahan.

Bupati Sukapura Raden Tumenggung Wiradadaha ka Regen Sumedang kapernah mertua sarta distrik-disrik nu katarik ka Kabupaten Sukapura aya 14: Cidamar, Kandangwesi, Nagara, Karang, Parung, Mandala jeung Cikembulan di pakidulan, beulah kaler distrik Batuwangi, Taraju, Balubur, Pasirpanjang, Janggala, Kawasen jeung Selacau.

Kabupaten-kabupaten anu kabawah ku Residen Priangan teh, nyaeta Kabupaten Cianjur anu dibupatian ku Dalem Adipati Prawiradiredja sarta distrikna ngan aya tilu. Balubur (troep atawa kacamatan Cibeureum, Peser, Cipoko, Cikondang, Cilaku, Cibalagung jeung Maleber), da ari Cikalong mah apan tanah partikulir kagungan putra-putra Dalem Adipati  Wira TanoeDatar (Enoh), tanah tuan N. Engelhard jeung tuan A. de Wilde nyaeta distrik Gunungparang, Ciheulang jeung Cicurug. Distrik-distrik Kabupaten Cianjur anu dua deui, nyaeta Jampangkulon jeung Jampangwetan.

Distrik-distrik nu jadi wewengkon Bandung aya 15: Bayabang, Rajamandala, Cilokotot, Balubur, Cicalengka,Limbangan, Cipeujeuh, Manabaya, Leles, Tarogong,  Banjaran, Cisondari, Kopo, Rongga jeung Cihea.

Ayeuna kakocapkeun perang di desa Lobener bawahan Indramayu. Dina tanggal 8 December 1816 nyebar beja yen jalma-jalma urang Krawang, Ciasem jeung Pamanukan reana aya 2500 lalaki anu samakta marawa pakarang, boga niat ka Nagara arek baha, nyieun karusuhan nu diluluguan kubudak ngora ngaran Bagus Jabin umur kira 16 taun, anak Bagus Sanda, dulur misan Bagus Rangin nu neruskeun jadi kapala rampog. Ku jalma-jalma nu niat ngaraman, eta bagus jabin diaranggap sakti.

Kapala-kapala rampog kabeh barayana Bagus Jabin; anu marilu nyaeta Bagus Bulun, Bagus Wangsa, Bagus Asidin, Bagus Brata, Tjandrawidjaja (Candrawijaya) jeung Taluk di dusun Lobener sisi walungan  Cimanuk beulah kulon geus ngumpul sarta taki-taki pisan, arek ngalawan upama ku soldadu jeung pulisi gupernemen ditempuh. Remen barandal nu keur ngumpul di Lobener-kulon didatangan ku utusan ti tuan residen Cirebon nu dijurungkeun mariksa naon sababna pangarek baha ka Nagara, sarta sina meper ulah ngalawan ka Gupernemen make pakarang, leuwih hade sadrah masrahkeun maneh ka pulisi ku jalan babadamian.  Jawaban ti barandal henteu puguh, anu tangtu mah pang baha ka Nagara kulantaran beurat teuing papancen jeung ngarasa diteungteuinganan, sarta loba jepit ku kapala-kapala desa jeung tukang ngepak Tionghoa.

Dina tanggal 9 December 1816, ieu barandalgeus ngaranjah kota Kandanghaur, ngarampasan rajakaya urang dayeuh, jelemanadipahala diusiran sina mabur, rea nu mubus nyingkiran bahla barandal, geus teutolih kana banda.

Anu jadi pangagung Nagara, babakuna tuan Residen Cirebon (tuan Servatius) ngaraos jengkel kabina-bina tina barandal teu beunang dipeper, diajak badami, nya dina tanggal 19 December diparentah deui panganggeusan, supaya nu jadi ulon-ulonna masrahkeun maneh ka pulisi, sarta dimana teu daek nurut, bakal ditangkep make jalan kakerasan. Barandal nanduk teu daekeun taluk, nya  dina tanggal 20 December 1816 mimiti ku militer jeung pulisi ditarajang diperangan, nu daratangna ti opat madhab, nyaeta ti Indramayu, ti Ujung, ti Losarang jeung ti Lobener-wetan.

Militer jeung pulisi anu ngambreg ti Indramayu kurang kuat, kapaksa mundur, atuh barandal teh ngangseg ka beulah kaler-kulon, nuju ka dayeuh Indramayu. Ngan hadena kaburu burudul balad Priangan nu diluluguan ku tuan residen W.C. van Motman ku anjeun, nu sumpingna ti Wanayasa ka Lobener-kulon, jolna ti Losarang sarta dibantu ku dua Bupati Priangan anu jadi Kapala-perang, nyaeta Bupati Sumedang Adipati Soerianagara sareng putrana anu pangbarepna Bupati Limbangan Adipati Adiwidjaja.

Barang amprok oge jeung musuh, nya eta barandal nu dikapalaan ku Bagus Jabin tea, geus teu antaparah deui, der bae perang campuh pohara pisan. Lila-lila barandal kadeseh ku balad Priangan, terus disedekkeun ka sisi walungan Cimanuk. Barandal anu meuntas ka beulah wetan kapegat ku balad Residen Cirebon, nu dibantu ku 160 soldadu detachement ti Samarang sarta ku balad Bupati Bengawan-wetan Adipati Nitidiningrat. Barandal ku balad Gupernemen ti Priangan jeung ti Cirebon katingker sama sakali, moal aya 25 rampog nu bisa lolos mabur ka kidul.

Barang perang geus bubar, meh kabeh barandal katangkep, anu tatu parna aya 100 jalma, anu kasambut aya 60 barandal nu paraeh di pangperangan, ari anu kaboyong jadi babandan aya 500 jalma, kabeh dikerid peuti dibawa ka Cianjur, baris dipariksa, sarta Gupernemen ngangkat tilu pangagung Walanda anu kapapancenan ngumisi, ngabuktikeun naon anu jadi sabab pang abdi-abdi baha ka nagara, nyaeta pangagung  tuan-tuan P.L. Chasse Z.  Veekens jeung tuan J.G. van Angelbeck. Iwal ti anu tatu ti militer jeung pulisi Gouvernement, anu kasambut dina perang di Lobener ngan aya 4 soldadu Walanda jeung 11 soldadu bangsa pribumi. Ieu carita beunang nyutat tina serat tuan Besar Gupernur Jendral Baron van der Capellen tanggal 26 December 1816.

Sajero taun 1817, repeh euweuh karusuhan barandal; barang mancat kana taun 1818 dina tanggal 29 Januari der desa Rajagaluh, Palimanan jeung Banjaran dihuru ku barandal nu diluluguan ku Bagus Serit, baraya Bagus Sidung jeung Bagus Rangin keneh. Asisten Residen tuan Heidenreichjeung Bupati Bangawan-wetan anu harita geus 70 taun yuswana Adipati Nitidiningrat, anu kakocapkeun dina waktu perang di Lobener tea taun 1816; ngabujeng kanu aya rusuh, tapi teu nyangga pulia, kasambut dina medan perang. Ieu karusuhan anu timbul deui anyar, ditumpesna ku nu jadi babaku nya ku militer bae, ngan kawasna bae Bupati Sumedang Adipati Soerianagara oge ngiring ngarepehkeun ieu huru-hara. Ti semet 1818 tug ka kiwari euweuh kajadian deui kaributan, rusuh, huru-hara anu sakitu poharana.

Ku bisluit Commissarissen General tanggal 13 Maart 1818 no.21 kalawan namina Sri Maha Raja Nederland, Bupati Sumedang Raden Adipati Soerianagara diganjar gelaran Pangeran, tina jalaran jasana parantos numpes huru-hara barandal dina mimiti taun 1817 jeung bulan Februari 1818. Ku taksiran, nya waktu eta keneh, mantenna dipaparin ku pamarentah Agung C.C.G.G. Bintang Emasnu gedena meh satampah make kangkalung sarta ditulisan ku kecap ieu: “Voor betoonde moed en trouw”, anu ku basa Sunda kieu pikecapeunana sugan: “Hiji tanda wawanen jeung kasatiaan anugeus ditembongkeun”. Tug nepi ka ayeuna eta Bintang digantungkeun dina jero lolomarian kaca di kamar panyeratan para Bupati nu ngageugeuh kabupaten Sumedang, di gedong padaleman (bisluitna ieu ganjaran ku anu nulis ieu karangan teu kapanggih). Ku bisluit C.C.G.G. tanggal 14 April 1818 no.24 kaidinan mantenna gentos jenengan jadi Pangeran Koesoemah Dinata.

Dina tanggal 16 Januari 1819, tuan G.A.G.P. Baron van der Capellen dijungjung jumeneng tuan besar Gupernur Jendral marentah jajahan Hindia-Wetan, ari nu dua deui tuan Besar C.C.G.G. Mr.C.Th. Elout sareng Jendral Laut A.A. Buijskes marulih bae ka nagara Walanda.

Ku Bisluit tanggal 1 Februari 1820 paraBupati sa tanah-Jawa nu diparentah ku Gouvernement Hindia Nederland mah nampi deui akte katetepan jumeneng Regent.  Ku bisluit Pamarentah (resolutie) tanggal 19 April 1821 Kabupaten Sukapura, lantaran kurang ngaluarkeun hasil Nagara, diburak, Bupatina Raden Tumenggung Wiradadaha dipansiun deui, sarta distrik-distrik bawahan ieu kabupaten dibagikeun ka tilu kabupaten, nyaeta :

• Sumedang kabagean distrik-distrik: Pasirpanjang, Janggala, Kewasen,Cikembulan jeung Mandala.

• Nu katarik ka wewengkon Limbangan distrik: Balubur, Taraju, Selacau,Batuwangi, Parung, Karang jeung Nagara.

• Nu diasupkeun ka wewengkon kabupaten Cianjur: distrik Kandangwesijeung Cidamar.

Bupati-pansiun Bogor-Krawang-Sukapura Raden Adipati Soerialaga (Dalem Talun) di Sumedang, nampi pansiun artos f.100,- saban bulan sarta dibantukeun damel, nampi piwarangan Residen Priangan dimana Nagara perlu make, nurutkeun bisluit tanggal 21 Augustus 1822, Dalem Talun nampi ieu ganjaran lantaran enggeus dipiwarang ngumisi Sukabumi jeung irig-irig tanah walungan Citarum dina taun 1821.

Ku bisluit 11 Januari 1823 tanah partikulir Sukabumi ku Gupernemen digaleuh ku arta f.800.000,- sarta tanah Cikalong dicandak deui ku Pamarentah nurutkeun bisluit tanggal 25 Februari 1823 ti ahli waris Bupati Cianjur nu pupus dina taun 1813 Raden Adipati Wira Tanoe Datar. Dina taun 1824 teu aya kajadian nu kudu dicaturkeun (dicaritakeun).

Ku bisluit tanggal 25 April 1825, patih Sumedang Raden Demang Mangkoepradja (Mangkupraja) ku Pamarentah kaidinan ngecagkeun kapangkatanana, digentos ku Raden Demang Natanagara, putra kaponakan Pangeran Koesoemah Adinata.

Ku bisluit tanggal 31 October 1825, Raden Demang Tanoewangsa, saderek Bupati pansiun Sukapura Raden Tumenggung Wiradadaha nampi kurnia gelaran Aria, jadi Raden Aria Danoeningrat.

Dina tanggal 24 Juli 1825 tuan Besar Gupernur-Jendral G.A.G. Ph. Baron  van der Capellen di Batawi nampi warti nu samasakali teu disangka-sangka, di Jokyakarta timbul karusuhan nu pohara pisan,lantaran nu jadi Residen tuan Smissaert dina damelna kacida tambelarna, henteu telik dina sagala rupa kajadian, nepi ka aya karaman teu kanyahoan ti tadina,tur ari deg geus tohaga pisan, nu diluluguan ku putra Sultan Hamangkoe Boewono (Hamengkoe Buwono III), Pangeran Ario Diponegoro, sarta nu jadi senapatina nu kamashurkeun Sentot Alibasah Prawiradirdja, nomoman yuswa 18 taun putra Raden Rangga anu baha (ngalawan) ka Governement dina jaman tuan Besar Maarschalk Mr.H.W. Daendels. Katambah nujadi senapatina teh Pangeran Mangkoeboemi jeung Kyai Madja ngaragkep jadi guru agama Islam dina peperangan.

Perangna  antara balad Gupernemen jeung balad Pangeran Aria Diponegoro nepi ka tanggal 28 Maart 1830, harita P. Diponegoro ka Magelang nepangan tuan Besar Jendral General  H.M. De Kock, terus dipiwarang ditangkep, dikirimkeun ka Semarang, terus diiangkeun ka Batawi, ti dinya dikendangkeun ka Manado dugi kapupusna di ditu. (Nb. Pangeran Diponegoro, Pahlawan Nasional, pupusna sareng dipendemna di Makassar, Sulawesi Selatan).

Tanah Priangan, henteu pisan kabaud kana ieu karusuhan, tapi sanajan euweuh karaman nu asup ka wewengkon Priangan, nguruskeun soldadu-soldadu jeung pangagung-pangagung Eropa nu lalar liwat arek ka pangperangan, estu pagawean lain lumayan, jaba ti nyadiakeun rupa-rupa jagaan nu ku pangagung Nagara dijalankeun kalawan tohaga pisan.

Harita Residen Priangan teh saderek tuan Besar Luitenant-Kolonel R.L.J. Baronvan der Capellen (sok disebut oge Jhr.R.L.J. van der Capellen), dina tanggal 31 Juli 1825 oge geus burber ngintunan serat ka sakabeh Bupati tanah Priangan, waktu eta Bupati Priangan ngan aya opat nyaeta :

1. Bupati Sumedang Pangeran Koesoemah Adinata (Pangeran Soegih nelahna).

2. Bupati Limbangan-Garut Raden Adipati Adiwidjaja

3. Bupati Bandung Raden Adipati Wiranata Koesoemah (Dalem Kaum)

4. Bupati Cianjur Raden Adipati Prawiradiredja (Dalem Kaum keneh nelahna)

da apan Sukapura mah geus diburak, nyarioskeun di Jogjakarta aya karusuhan sarta marentah supaya dijaga taki-taki bisi aya karaman asup ka wewengkon karesidenan Priangan.

Dina jero bulan October jeung November 1825 di Indihiang aya jagaan Bupati Cianjur nu nyandak kurang leuwih 400 prajurit jeung pamatang (prajurit nu tumpak kuda).

Nurutkeun serat-serat Residen Priangan, titi mangsa 31 October 1825 M pikeun Bupati Sumedang, Bandung jeung Limbangan No.1074, ahli-ahli tedak darah ti ieu tilu Bupati  aya hak dina jeneg Bupati nyandak upacara nganggo Bandera Walanda.

Pikeun nampi ieu bandera kanggo Bupati Limbangan nu kapapancenan, nyaeta : 

1.Raden Demang Patih Tanoewangsa, 

2.Raden Wiranagara (aom Abas) 

3.Raden Kanduruan Joedamanggala,

4.Raden Ngabei Pranadita

5.Raden Ngabei Kertiwadana.

Nurutkeun serat Bupati Cianjur titi mangsa Indihiang 30 October 1825, putrana di”purstel” ku tuan Resident, supaya nampi gelaran Tumenggung, nya dina serat tanggal 18 November 1825 dikabul ku Pamarentah Agung, Raden Aria Wiraredja  diganjar, jujuluk Raden Tumenggung Wiranagara.

Balad-balad para Bupati tanah Priangan nu ngajaga karaman Pangeran Aria Diponegoro di Tasikmalaya (dina dongeng mah di Tawang-banteng) dua rintakan, nya anu kadua kalina dina taun 1826 ti tanggal 1 september nepi katompernakeun bulan November 1826. Harita aya 300 perjurit jeung pamatang nu ngajaga di tasikmalaya, dikapalaan ku Bupati Sumedang Pangeran Kosoemah Adinata, nu jadi wawakil Residen Priangan sarta nu ngumendir purah natakeun perang tuan Majoor (Mayor) ngaragkep Adjudant tuan Besar, tuan Johan Jacob Perle nu pupus di Weltevreden tanggal 1 Juni 1853 M, dina ngagem kapangkatan titulair General Majoor.

Ti wangkid harita nelah Bupati Sumedang Pangeran Kornel, lantaran waktu perang ngapalaan balatantara, jadi wakil Residen Priangan, nu pangkatna dina waktu perang : Kolonel.

Pangeran Kornel nalika di Tasikmalaya nampi serat ti tuan Residen, titimangsa 12 September 1826, nu kieu unina :

"Mengataken pada tuan, dapet rapport dari tuan Kessinger (Inspecteur taneman kopi Nagara di Sumedang), kampung Rancabantar, cutak Darmawangi kena rampog, abis diambil barang lantas dibakar itu kampung, rupanya rampog dari Cheribon. Sabab kabarnya di Kandanghaur sudah lagih kabakar 6 kampung. Sekarang tuan Kessinger sudah suru kerja perjagaan: 50 orang Darmawangi, 30 orang Conggeang, 30 Malandang, 40 Cisegel, 30 Depok, 60 Cikadu, 40 Pawenang. Kalu tuan ada suka boleh suru pariksa lebih deket, dan urus, biar jangan rusuh di situh, kapan abis aku tunggu rapport."

Atuh Pangeran Kornel gura giru dina poe eta keneh geuwat jengkar nilarkeun Tasikmalaya mulih ka Sumedang, nyandak 100 perjurit jeung 40 pamatang. Barang dibuktikeun eta beja anu sidik, mana horeng lain rampog anu ngahuru kampung, leuweung kaso jeung manjah garing kakatigaan, kahuruan ngalentab kakampung-kampung, nu mere beja geugeumeueun bawaning ku sieun, kawantu werit, majarkeun kampung didurukan ku barandal.

Anu ngajaraga di Tasikmalaya nu dipulangkeun dina tanggal 25 November 1826 sina baralik, ulah kawaraan teuing, ieu hiji hijina: Ka Cianjur: Raden Moehtar (Muhtar), Mas Ditakoeroenia (Ditakurunia) jeung 187 perjurit, pakarangna bedil 32 jeung tumbak 136; ka Bandung Raden Tumenggung Anggadiredja (Anggadireja); Raden Demang Patih Joedanagara (Yudanagara); Raden Demang Wiratmadja; Raden Wiradipradja; Raden Rangga Satjanagara  jeung 132 perjurit, pakarangna bedil 58 jeung tumbak 129;

Ka Sumedang kapalana : Raden Demang Soetaprana, Raden Joedakoesoema, Raden Kanduruan Mangkoediwiria, Raden Kanduruan Satjakoesoema (Sacakusuma), Raden Kanduruan Astrajoeda, Mas Kanduruan Djagaresmi, Mas Kanduruan Argagoernita  jeung 138 perjurit, pakarangna mawa 31 bedil.

Ka Limbangan, kapalana Raden Raksadiredja (Raksadireja), Raden Tanoeredja, Raden Pranadita, Raden Dipadiredja (Dipadireja), Raden Wangsataroena jeung 47 prajurit pakarangna mawa bedil 8 jeung tumbak 16.

Dalem Talun Adipati Soerialaga II waktu ngajaga Tawangbanteng henteu aya, lantaran damelna henteu kamanah ku tuan Residen, nyusuk Cimanuk nu liwat ka pasir Cikateng, susukan anu ditaekkeun 9 kaki, Residen Priangan nampi sesendu, ngajaga di Tasikmalaya teu didawuhan.

Tuan Residen Priangan Jhr. R.L.J. Van Der Capellen dina tanggal 2 Februari 1826 sasarengan sareng rakana tuan Besar mulih ka Nagara Walanda.  Tuan Besar G.A.G. Ph. Baron Van Der Capellen masrahkeun pamarentahan Hindia ka tuan Leknan Gupernur-jendral Hendrik Markus Baron de Kock, nu saestuna sasat jadi Gupernur Jendral tanah Hindia, ngan kawasna wae dibawah ku Commissaris-Generaal  Leonard Pieter Jozef Burgraaf du Bus Gisigniesnu sumping ka Batawi dina dintenan tuan Besar Baron van der Capellen jeng karka  nagara Walanda. Tuan Residen Priangan Baron van der Capellen  diganti ku tuan Residen  Pieter de Clercks nu dina taun 1827 ngarangkep jeung Residen Cirebon, terus jadi "tina perkara urusan uyah-Nagara. Ari padamelan Residen ditangkes ku Secretaris Priangan tuan H. Du Buij; kakara dina katompernakeun taun 1828 aya deui Residen O.C. Holmberg de Beckfeldt.

Tina jasana Pangeran Kornel ngajaga karaman di Tasikmalaya mundut ampun kangge “sanak mantu kaponakan Raden Wiraredja tilas Kapala cutak Pawenang, nu dibuang ka Banyuwangi, supaya sina mulih ka Sumedang kaluar tina hukuman”. Ku tuan Besar Komisaris Jendral panuhun Pangeran Kornel dikabul, Raden Wiraredja iasa sumping deui ka Sumedang sarta teras jenenganana dil andi Raden Soemadilaga nu engkena jeneng biskal di Sumedang.

Samulihan Pangeran Kornel tina pangjagaan di Tawangbanteng, lantaran geus sepuh, sok teu damangan. Dina tanggal 10 Februari 1828 mantenna nyanggakeun serat ka tuan Besar Comissaris-Generaal nu kieu pok-pokanana :

"Ini hamba punya permintaan pada Sripaduka tuan Besar, jika boleh, atas segala Prentah Gouvernement biar jatoh pada hamba punya anak Tumenggung Somanagara, jadi Regent di tanah Sumedang; boleh kurniai pangkat dan nama Adipati Koesoemajoeda (Kusumayuda), hamba punya wakil yang selsekan sekalian prentah Gouvernement, boleh buatken padanya, mudah-mudahan bisa mangawula pada orang Besar adanya.”

Panuhun Pangeran Kornel ku Pamarentah Agung dikabul sarta nurutkeun bisluit Komisaris-Jendral tanggal 15 April 1828, No.22 : RadenTumenggung Somanagara dijenengkeun kalawan diangkat kana Adipati sarta jadi Bupati Sumedang, tapi make perjangjian nohonan kana pamundut Pangeran Koesoemah Adinata. Dimana nu jadi rama geus teu aya, ku Pamarentah kaidinan nyandak jenengan Koesoema Joeda jeung gelaran Adipati, sarta terus sapada harita jumeneng regen: jadi salilana ramana jumeneng keneh mah, Raden Tumenggung Somanagara tetep ngawakilan nu jadi rama bae.

Tuan Secretaris karesidenan Priangan  Du Buij dina seratna titi mangsa 30 Juli 1828, ka tuan besar unjukan, yen Pangeran Koesoemah Adinata Bupati Sumedang (Pangeran Kornel) dina wanci tengah wengi tabuh 12 parantos pupus sarta nurutkeun bisluit 15 April tea putrana Raden Tumenggung Somanagara, sadugna rama wapat, jumeneng Regent Sumedang, jujuluk Raden Adipati Koesoemajoeda.  Surat tuan Secretaris Du Buij nungunjukkeun pupusna Pangeran Kornal di AlgemeeneSecretaris di Batawi dijieun bisluit katetepan angkatan kana Bupati Sumedang Raden Adipati Koesoemajoeda henteu katampi kawasna.

Salam Santun

Sumber :

Buku "Sajarah Sumedang", tulisan RA Natanagara  (Sambungan VA 1935)

Baca Juga :