Ngariksa Jatigede, 8-9 Desember 2016

Berita Jatigede Sumedang, Ngariksa Jatigede, Kemis-Jumat, 8-9 Desember 2016. Beungeut cai (Muka Air Waduk/MAW) kurang leuwih dina 248 Mdpl. Beja-na bulan Februari 2017 pamarentah arek mereskeun ngeueum Jatigede nepikeun ka 262 Mdpl (leuwih tereh batan rencana mimiti kana Maret-an 2017). Mun diitung-itung, Desember ka Februari teh kana 3 bulan deui (berarti rata-rata tiap bulan pamarentah arek naekeun cai 4,6 m/ 262 - 248 = 14 : 3 = 4,66 m). 

Ti mimiti kajadian caah dengdeng Cimanuk, kira-kira dua satengah bulan kamari (21 September 2016) hambalan cai teu nuduhkeun naek nu rongkah, numutkeun pangriksaan seuweu siwi Cimanuk jeung Paguyuban Keuyeup Bodas, beungeut cai teu leuwih ti 249 Mdpl (nu rongkah mah leutak alatan banjir girang Cimanuk nu beuki meudeud dina wangunan waduk). Naon wae nu deuk dilakukeun ku pamarentah, kumaha karepna wae, sanajan kami keur teu wasa mun kudu ngobah kaputusan pamarentah, sawasana wae, nepikeun ka iraha oge (dasarna tina nyaah lain ngewa da mun ngewa geus antepkeun wae), tuluy ngelingan yen "larangan dirempak, buyut diobah" bakal mawa mamala. 

Caah dengdeng di girang nu kajadianna karak dina lawang ngijih (malah numutkeun itungan mah keur dangdangrat) geus mere totonden, mun arinyana teu meunang dielingan, tarima wae balukarna, lain ngajurung atawa ngadu'akeun, tapi da kitu pakemna. Nyanggakeun ka Nu Maha Wasa. (Rahmat Leuweung)

Baca Juga :