Wangsit Siliwangi Prabu Nusiya Mulya

Wangsit Siliwangi: Prabu Haris Maung (Nusiya Mulya), Raja Pajajaran ka VIII.

“Sampurasun….seuweu siwi Pajajaran anyar,

Kula datang tinu anggang, ngalongok barina sono,

Lantaran arinyana rea nu geus poho,

Nu matak teu marahi da sok dimumurah,

Kasilih ku wadah luis jeung ginding, tibelat ku adat semah,

Nu ngadon bebetah bari ngaranjah kebon jeung sawah,

Ngaranjah barina melak campuh ngipuk jeung tandur,

Tapi lain melak kapas jeung kalapa,

Tapi ngipuk tandur musuh jeung dulur,

Melak renggang baraya,

Pribumi sina teu eling ka purwadaksina,

Sina linglung ka luluhurna,

Sina benci ka tali paranti,

Ku basa kapir jeung musyrik,

Ku basa kufur jeung takhayul,

Nuduh cenah sesa Hindu.

Sok rajeun aya nu eling

Bari mapay-mapay lacak luluhurna

Wangsit ! Uga ! katut Pusaka

Saha ?

Nyaeta budak angon

Nu imahna di birit leuwi

Nu miskin barina sugih tur tumaninah

Lumantung beurang jeung peuting

Ngangon naon ?

Lain ngangon sapi lain munding

Lain embe lain domba

Lain meri lain soang

Tapi ngangon kalakay daun jati

Ngasuh tutunggul nu saestu

Nu wawuh kana semu

Nu mukit kana wawangi nu sajati

Nu rancage hatena

Nu alus laku lampahna

Nu mitutur ka batur salembur

Nu miwulang ka baraya sauyunan

Naon bawaanna ? bawana teh…

Amparan tegal si awat-awat

Terusan jalanna ka bale aray

Nanggung kaneron butut

Eusina panglay geus nahun beunang ngunum tujuh taun

Naon karesepna ?

Ngelingan kanu keur linglung

Nu asa genah na salah, nu sok ngawur kasintu, nyieuhkeun hayam

Ngajak ngaguar sajarah

Nu ku semah jero ratusan taun digadabah jeung dibeslah

Ngelingan tanpa buruhan

Da lain urang sabrang

Nu ngadon daragang carita

Nu di ukir direka

Sangkan pribumi kabita

Ngelingan yen jati kasilih ku junti

Dayeuh maneuh meuweuh ku manganeuh

Taman endah reujeung subur geus kaliput ku situ

Nagara beunghar ku hutang

Nu pinter ngomongna cowong

Hahaok hareupeun corong

Tapi bari baredegong

Tur bari hareuras beuheung, teu beda ti bedul jeung bagong

Teu daek ngalieuk kanu euweuh

Da pinter kabalinger ieu aing paling bener

Teu awas ku ajag jeung monyet

Nu ngaranjah kebon jeung sawah

Bari ngawut-ngawut dapur batur

Buta-buta nu baruta

Lain buta daruwiksa

Tapi nu dahar taya seubeuhna

Kadedemes hawek careraman

Buta nu sagala beuki

Nu nenjo bari molotot

Panonna nongtot

Teu awas kanu dipincuk ku daun garut diseumat ku merang awi

Sabab gede mata batan pincuk

Samaruk kupat tahu

Ayeuna budak angon !!!

Jongjon ngorehan

Teu hiding kanu ngalarang, nyarekan jeung nyingsieunan

Nu mitnah tur nyangka setan teu didenge teu dilawan

Ditampa ku ikhlas jeung sabar

Dina amparan dibabar

Da hayang mahi sarerea

Ngorehan reujeung manggihan, nyungsi jeung diampihan

Ngahormat kanu kagungan wiwitan

Diteundeun di handeuleum sieum, pikeun anu datang nyampeur

Ditunda di hanjuang siang, nganjangan nu bakal ngala

Saha ?

Nyaeta nu boga hakna, tuluyna budak angon jeung budak janggotan

Regepkeun !

Tuh langit beulah kulon geus beureum

Dibarengan kunu saliduru, sadulur saturunan

Bari dititah batur, parebut eusi dapur

Nu siduru kajongjonan

Atuh heuay merelek bari nundutan

Atuh tigebrus kana durukan

Reuwas hudang pada nafsu

Bari linglung ka dulur saturunan

Seak mesat gobang kabuyutan

Geus areling, nyeh…nyalengir

Geuning saturunan

Regepkeun !

Tuh langit beulah kaler geus beureum euceuy

Didinya ge aya nu saliduru, sadulur saturunan

Bari nungguan beubeuleumannana

Warisan ti luluhur

Teu wudu campuh, parebut bari jeung gelut

Begal nyawa, leungit pati

Garelutna aya nu ngatur (nu di kulon, nu di wetan)

Eta keneh, eta keneh

Ngatur gelut bari dagang

Milu campuh bari untung

Siga sedih tapi seuri

Mucekil loba rejeki

Ladang mimis jeung bedil

Ari urang kumaha ?

Regepkeun !!!

Buta-buta nu baruta garelut deui pada parebut pakan kosong

Nya datang nu boga haqna

Buta teh areraeun

Areraeun gelutna, bari henteu kabaragean

Sabab beak dipake mayar hutang

Regepkeun !!!

Jaman riweuh beuki maceuh

Pacampuh ketir jeung keueung

Kabeh pada nareangan budak angon

Nu imahna di birit leuwi

Pantona batu satangtung

Hateupna handeuleum sieum

Tihangna hanjuang siang

Babarengan jeung budak janggotan

Bejana geus nindak di lebak cawene

Bari buburak ku panglay beunang ngunum tujuh taun

Bisi aya nu katumpangan

Regepkeun !!!

Dimana engke gunung gede geus bitu

Bari disusul ku tujuh gunung

Pek tareangan eta budak angon jeung budak janggotan

Tuh di lebak cawene

Ngan omat ulah ngalieuk ka tukang.

Cag ! Sakitu, geura narindak.

Mugia aya manfaatna.

___________________
Ieu Naskah Dokumentasi kenging ibu Hj. Netti Medina (alm).

Baca Juga :