Ngabungbang, Ngabersihan Diri sareng Ngaruwat Jagad 14 Mulud di Cipaku Darmaraja

Seuweu - siwi Cipaku  nu darihin, kanggo 14 Mulud Ngabungbang, Ngaruat Jagat, Ngabersihan Diri, urang kedah mandi di 7 pancuran, di 7 muara walungan Cimanuk, anu ayeuna tos ngahiji di Bendungan Jatigede. Jadi cekap mandi di Jatigede eta sami sareng mandi di 7 muara Cimanuk. Waktosna jam 12 peuting.

Baca Sahadat Cipaku  dan  Rajah Kidung dihandap :

Sahadat Cipaku Darmaraja

Sang Kuncung Batara Wenang,

sanika ku AllooH langit ngait jagat rapak,

tarima badan kaula sirna Adam,

Hu Allooh, Hu AllooH, Hu AllooH, Hu Allooh,

laa ilaHa illallooH muHammaddarosulullooH.

Rajah Kidung Saripanggung

Bul kukus ka awun-awun

menyan putih nitis hurip

Dupa sekar pangawasa

Hiliwir ka tepis wiring

Nyambuang ka awang-awang

Wangi sari ngadalingding

Sup asup na sungsum balung

Jadi kulit jadi daging

Nyaksrak ngeunah kana awak

Ngageuing jasmani tanding

Ngahudang sinukma tandang

Sangkan lilir eling diri

Tus nutus ka wujud mungkus

Bibit buit asal awit

Ti sang rama asal mula

Saresmi sirna ning galih

Sarasa dayaning polah

Anu ahir medal cisir

Rup surup di Ibu ngandung

Ngancik dina cupu manik

Ngambah dina Guha Garbah

Satitik sumidik bukti

Sakeclak nyengcelak nyata

Jadi jirim hiji jisim

Cur mancur cahaya enur

Nitis rintih kanu putih

Ragrag kana kama rama

Kulisik ngajadi usik

Kuliat mangrupa sifat

Jadi bayi utun inji

Cul ngantun di Ibu santun

Nganti dina alam batin

Tapa dina alam pana

Salami salapan sasih

Gurudjag si Jabang medal

Ngicip- ngicip alam lahir

Pun ampun ka rama ibu

Laksa keti tata titi

Tuang wajah neda tobat

Kiwari bebersih diri

Sumeja ruruat badan

Mugi sami sihaksami

Kum sakum ka sepuh umum

Nu lastri tanpa bukti

Seja neda dihampura

Babakti ka meli sari

Sinerkar paesan tunggal

Ulah nitis tumaritis

Duh ampun nu jadi dulur

Santen tali ari-ari

Seja nyambat neda maap

Sausik teu matak runtik

Sausap teu matak hilap

Urang sami-sami hurip

Nun nuhun ka Dat Nu Agung

Maha suci sifat gaib

Asma purwa anu nyata

Nu maparin rahman rahim

Apalna saalam dunya

Wedi asih welas adil

Pung ngapung ka luhur manggung

Ka Dewa di Otipati

Ka handap ka Purwa Kala

ka gigir ka putri geulis

Sang Tanana maduretna

Seja amit wanti- wanti

Nu gaduh nya galur catur 

Bibit warti eusi gurit

Ulah arek gunasika

Mandawi ka diri jisim

Mandawa ka anu rea

Ulah nyiwit sumareungkit

Sad sadu teu bendu kalbu

Ka sugrining para Wali 

Nu salapan ka koncara

Ahli gending seni dangding

Tukang ngarang cipta wayang

Mugi ulah nyisikudi

Tur cadu ka surup hantu

Baid karanjingan jurig

Istan kaserepan setan

Dedemit sing gancang indit

Ririwa sing gancang mulang

Balik kana asal ngancik

Tug tutug ka ratu lembur 

Sang Pertiwi ais bumi

Sang Pertala sangga lemah

Pribadi peryogi widi

Neda jembar pangampura 

Ulah jail hiri dengki

Lus banglus nya umur mulus

Pait daging seukeut kuping 

Pahang tulang uteuk caang

Tarik kulit bersih getih

Liat urat cekas awas

Diri jati tebih pati

Tup tutup ku kidung ngayuh 

Astagfirullah hal adim

Nya bubar ku rajah singlar

Leungit rupi- rupi sulit

Anu tinggal waras badan

Sugih mukti jembar harti

Amiin ya robbal alamin,

Mugi Gusti nangtayungan.

Nu nuju teu damang rongkah, nu nuju mejus, seueur mamala, tiasa ngakukeun ngaruat diri nyalira, carana kitu Malem 14 Mulud, niatkeun sateuacana, sing yakin ka Gusti Nu Agung, teu aya nu ngusikeun oge malikeun iwal ti anjeuna. 

Ti sabadana isa siap-siap ngadoa ka nu kawasa, menekung mujasmedi, jam 12 wengi pas moncorong bulan Purnama, nembe mandi / adus / kungkum / ngeueum, bacakeun Sahadat Cipaku sareng Kidung Pangruat Diri anu diluhur. 

Insya Allah pami nu yakin mah panyawat naon wae tiasa cageur sapertos sabihara sabihari deui.

Doa Mandi saatosna ngeueum :

"Bismillahirohmanirohim, nawaetu adus banyu, kalawan wadah gedah kancana Bagenda Ali Pangeran Dadali Putih, Kang ngais nangtu ngais, kang dadi rembeng iman fil udusi, Laillaha Ilallah Muhammadarosululloh".

Pami nu teu tiasa Malem 14 Mulud ka Astana Gede Cipaku / Ngeueum di Jatigede, nyandak cai sabotol teras simpen, engke malem tanggal 14 mulud, dibumi lebetkeun kana ember, jam 12 wengi mandi nganggo cai eta dicampuran ku cai nu aya di bumi. 

Elmu Cipaku mah elmu nyipuh diri, da nu jadi pusaka urang Cipaku mah sanes keris, sanes pedang, sanes paku emas, sanes batu ali, sanes kantong macan, jrrd tapi diri urang sorangan. 

Nu mawi anu disipuh nya diri urang nyalira, Pami tos dugi ka Elmu Cipaku, saciduh metu saucap nyata, weruh sadurung winara, nepi memeh indit.

Elmu Cipaku sanes kadugalan teu teurak dikadek tapi bedogna oge teu nepi Salamina dipayungan ku nu Agung, diaping ku Nu suci, dijaga diriksa ku Nu Kawasa.

Baca Juga :